نوٹ بندی سے غریبوں پر پڑی مار، امیروں کو ہوا فائدہ:راہل گاندھی نے پھر سادھا مودی پر نشانہ؛ کہا؛اقتدار پر آنے کی صورت میں 10 دن کے اندرچھتیس گڑھ کے کسانوں کا کریں گے قرضہ معاف
مہاس مند:13/نومبر(ایس او نیوز/آئی این ایس انڈیا) کانگریس صدر راہل گاندھی نے نوٹ بندی کو لے کر وزیر اعظم نریندر مودی پر جوابی حملہ بولا اور کہا کہ نوٹ بند کرنے سے غریبوں کو نقصان ہوا اور ’سوٹ بوٹ‘ پہننے والے امیروں کو فائدہ ہوا۔
چھتیس گڑھ میں 20 نومبر کو ہونے والے دوسرے مرحلے کی پولنگ سے پہلے یہاں ریلی سے خطاب کرتے ہوئے گاندھی نے مودی حکومت پر رافیل طیارے سودے کے ذریعے انل امبانی کی کمپنی کو فائدہ پہنچانے کا اپنا الزام بھی دہرایا۔ کانگریس صدر نے کہا کہ مودی حکومت نے غریبوں سے 30 ہزار کروڑ روپے چھین کر صنعتکار کی جیب میں ڈال دیئے۔انہوں نے کہا کہ اگر کانگریس چھتیس گڑھ میں اقتدار میں آئی تو حکومت میں آنے کے 10 دن کے اندرریاست کے کسانوں کا قرض معاف کر دے گی۔گاندھی نے کہاکہ مودی نے کہا تھا کہ نوٹ بندی سے لوگوں کے تکیے کے اندر سے پیسہ باہر نکلا۔وہ صحیح ہیں۔لیکن انہوں نے یہ نہیں بتایا کہ پیسہ کس سے چھینا گیا۔تمام غریبوں کو قطار میں لگنا پڑا۔کیا کوئی ارب پتی قطار میں لگا تھا؟ کیا سوٹ بوٹ پہنے کوئی شخص قطار میں دیکھائی دیا۔؟
انہوں نے کہاکہ ہندوستان کے وزیر اعظم نے امیروں کا کالا دھن سفید میں تبدیل کرنے میں مدد کی۔انہوں نے غریبوں کا پیسہ لیا اور امیروں کو فائدہ پہنچایا۔وزیر اعظم نے سونیا اور راہل گاندھی کا نام لیے بغیر کہا تھاکہ وہ نوٹ بندی کا حساب چاہتے ہیں۔نوٹ بندی کی وجہ سے فرضی کمپنیوں کی شناخت ہوئی۔اور اس کی وجہ سے آپ کو ضمانت لینی پڑی۔آپ کیوں بھول جاتے ہیں کہ نوٹ بندی کی وجہ سے آپ کو ضمانت مانگنی پڑی۔