رافیل سودا :راہل گاندھی کا حملہ، وزیر اعظم نے پرسنلی بدلی ڈیل، کچھ تو گھپلا ہے؟
نئی دہلی6فروری( ایس او نیوز؍آئی این ایس انڈیا ) لڑاکا طیارے رافیل سوداکو لے کر کانگریس صدر راہل گاندھی نے ایک بار پھر مودی پر سوال اٹھائے ہیں۔ راہل گاندھی نے کہا کہ یہ پہلی بار ہو رہا ہے جب حکومت ملک کو یہ نہیں بتا رہی کہ ایک لڑاکا طیارے کی قیمت کیا ہے؟ وہیں وزیر خزانہ جیٹلی نے رافیل ڈیل کے سوال پر خاموشی اختیار کر لی۔ راہل گاندھی نے کہا کہ پہلی بار ہو رہا ہے کہ وزیر دفاع کہہ رہیں ہے کہ جو پیسہ دیا ہے ہوائی جہاز خریدنے کے لئے وہ کسی کو نہیں بتائیں گے۔ یہ کیا طریقہ ہے؟ میں نے گجرات کے انتخابات میں بھی یہ مسئلہ اٹھایا، میں نے کہا کہ ڈیل میں گھپلا ہوا ہے۔ وزیر اعظم مودی کو نشانے پر لیتے ہوئے راہل گاندھی نے کہا کہ وزیر اعظم نے پرسنلی یہ ڈیل کروائی ہے۔ اس کے لئے وزیر اعظم پرسنلی پیرس گئے، وہاں پر ڈیل میں بدلاؤ کئے گئے، یہ بات پورا ملک جانتا ہے۔ لیکن وزیر دفاع کہتی ہیں کہ ہم ملک کو نہیں بتائیں گے، اس کی صرف ایک ہی مطلب ہوتا ہے کہ اندرون خانہ کوئی نہ کوئی گھپلا ضرور ہوا ہے۔واضح ہو کہ وزیر دفاع نرملا سیتا رمن نے کہا کہ رافیل ڈیل سے منسلک اطلاعات خفیہ ہیں، لہٰذا اس کا اشتراک نہیں کیا جا سکتا۔ انہوں نے کہا کہ بھارت اور فرانس کے درمیان رافیل طیارے کی خریداری کو لے کر ہوئے حکومتی معاہدہ کے آرٹیکل 10 کے مطابق 2008 میں بھارت اور فرانس کے درمیان کئے گئے سیکورٹی معاہدے ، طیاروں کی خریداری، خفیہ اطلاعات کی راز دای اور مواد کے تبادلے پر لاگو ہیں۔