امیٹھی 17 اپریل ( ایس او نیوز؍آئی این ایس انڈیا)ملک کی کئی ریاستوں میں اے ٹی ایم سے اچانک نقدی رقم غائب ہونے کے درمیان کانگریس صدر راہل گاندھی نے منگل کو وزیر اعظم نریندر مودی پر جم کر نشانہ لگایا۔ انہوں نے کہا کہ مفرور ڈائمنڈ کاروباری نیرو مودی اور میہول چوکسی کو ’ اچھے دن‘ مہیا کراکر انہوں نے ملک کے بینکاری نظام کو برباد کر دیا ہے۔راہل نے ڈائمنڈ کاروباریوں کی طرف سے کئے گئے بینکاری گھوٹالہ پر خاموشی اختیار کرنے کے لئے بھی مودی کی تنقید کی۔ راہل نے کہا کہ مودی جی نے بینکاری نظام کو برباد کر دیا، نیرو مودی تیس ہزار کروڑ روپے لے کر بھاگ گیا اور وزیر اعظم نے ایک لفظ بھی نہیں کہا۔انہوں نے کہا کہ ہمیں قطار میں کھڑے ہونے کے لئے مجبور کیا گیا، کیونکہ انہوں نے ہماری جیب سے 500۔1000 روپے کے نوٹ لے کر نیرومودی کی جیب میں ڈال دیا۔راہل گاندھی ملک کے اے ٹی ایم میں نقدی نہ ہونے کے سوال کا جواب دے رہے تھے۔ راہل نے کہا کہ وزیر اعظم بجٹ اجلاس کے دوسرے مرحلے میں بولنے سے ڈرے ہوئے تھے، اس مرحلے میں مختلف پارٹیوں کی طرف سے مخالفت کی وجہ سے کام کاج نہیں ہو پایا تھا۔ انہوں نے کہا کہ اگر ہمیں پارلیمنٹ میں رافیل مسئلے، نیرومودی کے معاملے میں بولنے دیا گیا ہوتا، تو وزیر اعظم ہمارا سامنا نہیں کر پاتے۔کانگریس صدر نے کہا کہ مودی ذاتی طور نیرومودی اور چوکسی کو جانتے ہیں اور انہیں نیروبھائی اور میہول بھائی کہہ کر پکارتے تھے۔ راہل نے کہا کہ ملک کے لئے ان (وزیر اعظم) کی طرف سے کیا گیا’اچھے دن‘ کا وعدہ نیرومودی اورمیہول چوکسی سمیت صرف 15 لوگوں کے لئے تھا۔ کسان، مزدور، دہاڑی مزدور سمیت اس ملک کے غریبوں کے لئے صرف’ برے دن‘ہیں ۔