راہل گاندھی پہلے امیٹھی کا حساب مکمل کریں : امیت شاہ
امیٹھی10؍اکتوبر ( ایس او نیوز؍آئی این ایس انڈیا )بھا رتیہ جنتا پارٹی (بی جے پی) کے صدر امت شاہ نے کانگریس کے گڑھ امیٹھی میں نہرو۔گاندھی خاندان پر زبردست حملہ کرتے ہوئے آج کہا کہ راہل گاندھی گجرات سے پہلے اپنے پارلیمانی حلقہ امیٹھی کی ترقی کا حساب کتاب دیں۔مسٹر شاہ نے یہاں ایک ریلی سے خطاب کرتے ہوئے کہا کہ ملک اور ریاست میں مسٹر گاندھی کے پرنانا، دادی اور باپ نے حکومت کی ؛ لہذا ان پر واجب ہے کہ وہ پہلے اپنے ستر سالہ اقتدار میں ہوئی بدعنوانی اور ترقیوں کا حساب دیں ،انہوں نے راہل گاندھی کی تنقید کرتے ہوئے کہا کہ جسے اپنا سابقہ ریکارڈ بھی یاد نہ ہو وہ بھلا کیوں کر علاقہ میں ترقیات کا خواہاں ہوسکتا ہے ۔ واضح ہوکہ راہل گاندھی نے امیت شاہ کے بیٹے جے شاہ کی کمپنی میں پر اسرار طریقہ سے ٹرن اوور میں بے تحاشہ اضافہ کے متعلق ’’ دی وائر ‘‘ کے سنسی خیز انکشاف کے بعد بی جے پی پر سخت حملہ کرتے ہوئے کہا تھا کہ جو سرکار پہلے بیٹی بچاؤ تحریک چلایا کرتی تھی وہ سرکار اب ’’ بیٹا بچاؤ ‘‘ تحریک پر عمل کر رہا ہے ۔ کانگریس کے یوراج راہل گاندھی اور کپل سبل سمیت اپوزیشن کے دیگر لیڈران سیتا رام یچوری وغیر ہ نے بھی اس مبینہ ’’ انکشاف ‘‘ پرسخت ایکشن لیتے ہوئے سی بی آئی سے تفتیش کا مطالبہ کیا تھا ، واضح ہوکہ ’’ دی وائر ‘‘ کے خلاف سو کروڑ کا ہتک عزت کا نوٹس بھی جاری کر دیا گیا ہے ۔