رافیل معاملہ: بسوجیت رانے نے کانگریس کے آڈیو کلپ کو ’ترمیم شدہ ‘ بتایا، جانچ کی مانگ
نئی دہلی،3 جنوری (ایس او نیوز؍آئی این ایس انڈیا)گوا کے وزیر بسوجیت رانے نے رافیل سودا معاملے میں مرکزی حکومت کو گھیرنے کے لئے کانگریس کے آڈیو کلپ کو’ چھیڑ چھاڑ‘ والا قرار دیتے ہوئے بی جے پی صدر امت شاہ کو بدھ کو بتایا کہ انہوں نے ریاستی حکومت سے اس معاملے میں تحقیقات کا حکم دینے کے لئے کہا ہے۔شاہ کو لکھے گئے خط میں رانے نے کہا کہ اس رافیل معاملے پر انہوں نے کبھی کسی سے کوئی بات چیت نہیں کی۔
بھارتیہ جنتا پارٹی کے ذرائع کے مطابق رانے نے کہا ہے کہ میں نے وزیر اعلی منوہر پاریکر کو ایک خط بھیج کر اس معاملے میں شرارتی عناصر کو بے نقاب کرنے کے لئے فوری طور پولیس اور فوجداری تحقیقات کا مطالبہ کیا ہے۔شاہ کو لکھے اپنے خط میں، رانے نے یہ بھی کہاکہ یہ ایک ترمیم شدہ آڈیو ہے اور میں نے اس موضوع پر کبھی کسی کے ساتھ کوئی بحث نہیں کی ہے۔رانے نے پاریکر کو لکھے گئے خط میں کہاکہ میں وزیر اعلی کو مطلع کرنا چاہتا ہوں کہ کوئی شرارت کر رہا ہے۔اس معاملے میں جانچ ہونی چاہئے۔ایسے شرارتی عناصر کو گرفتار کیا جانا چاہئے۔
دراصل کانگریس نے بدھ کو پاریکر کے اس مبینہ دعوے پر وزیر اعظم نریندر مودی سے جواب مانگا تھا جس میں سابق وزیر دفاع نے کہا تھا کہ رافیل سودے کی ایک فائل ان کے پاس ہے اور اپوزیشن پارٹی نے یہ بھی پوچھا کہ کیا یہی وجہ ہے کہ مشترکہ پارلیمانی کمیٹی کی جانچ کا حکم نہیں دیا جا رہا ہے۔غور طلب ہے کہ کانگریس کے اہم ترجمان رندیپ سنگھ سرجیوالا اپنے الزامات کی تصدیق کے لئے ایک ایسی بات چیت سامنے لائے ہیں جس نے مبینہ طور پر رانے اور ایک اور شخص کی آواز ہے۔