مجاہد پاشاہ کوچیرمین شپ سے ہٹانے آر اشوک کامطالبہ
بنگلورو،8؍جنوری(ایس او نیوز)سابق نائب وزیراعلیٰ و بی جے پی کے رکن اسمبلی آر اشوک نے آج کہا کہ کانگریس نے یہ دعویٰ کیا ہے کہ ایس ڈی پی آئی تنظیم کے ساتھ اس کا کوئی تعلق نہیں ۔ اگر یہ سچ ہے تو بی بی ایم پی میں اس تنظیم کے کارپوریٹر مجاہد پاشاہ کے ساتھ اتحاد کرکے انہیں ہیلتھ اسٹانڈنگ کمیٹی کا چیرمین کیوں مقرر کیاگیا ہے ؟ کانگریس جوکہہ رہی ہے یہ واقعی سچ ہے تو مجاہد پاشاہ کو ہیلتھ اسٹانڈنگ کمیٹی کی چیرمین شپ سے فوری ہٹایاکیوں نہیں جاتا؟ دیپک راؤ کے قتل کی مذمت کرتے ہوئے آج شہر کے آنند راؤ سرکل پر کئے گئے احتجاجی مظاہرہ میں خطاب کرتے ہوئے انہوں نے کہا کہ ہمارا یہ احتجاج ملک کے غداروں کے خلاف ہے ۔انہوں نے بتایا کہ ریاستی وزیراعلیٰ سدارامیا ذات پات کی بنیاد پر سیاست کرنے کی کوشش کررہے ہیں۔ ویرشیوا اور لنگایتوں کے درمیان بڑی خلیج پیدا کرنے کی کوشش کررہے ہیں۔اس طرح کی سیاست کرنے والے سدارامیا کو یونیورسٹی سے پی ایچ ڈی دی جانی چاہئے ۔کولیرو، درج فہرست ذات اور قبائل اور ایسے ہی طبقات کے لوگوں نے وزیراعلیٰ سدارامیا سے بذریعہ فون اتنا کہنا کافی ہے کہ ہم تمام متحد ہیں تو فوری ان میں پھوٹ ڈال دیں گے ۔ اشوک نے کہا کہ ریاست میں جب تک سدارامیا ہیں ، ہندوؤں اور مسلمانوں کے لئے اتحاد و اتفاق سے رہنا ممکن نہیں ۔پھوٹ ڈالو اور حکومت کرو ان کی پالیسی ہے ۔ انہوں نے الزام لگایا کہ غریب ہندو اور مسلمانوں کے لئے اس ریاست میں کوئی مقام نہیں ۔انہوں نے بتایا کہ ریاست میں اب تک22ہندو کارکنوں کا قتل ہوا ہے۔اسی ماہ 28جنوری کووزیراعظم نریندر مودی ریاست کے دورہ پر آرہے ہیں،تب ان تمام باتوں کاجائزہ لیں گے ۔