دوحہ،2جولائی(ایس او نیوز؍آئی این ایس انڈیا)قطر کے وزیر خارجہ نے کہا ہے کہ سعودی عرب اور اس کے اتحادی ممالک کی طرف سے مطالبات دراصل مسترد کرنے کی خاطر ہی پیش کیے گئے ہیں۔ شیخ محمد بن عبدالرحمان الثانی نے روم میں صحافیوں سے گفتگو میں کہا کہ اگرچہ ان ممالک کی طرف سے الٹی میٹم دہشت گردی کے خاتمے کے لیے دیا گیا ہے لیکن اس سے دوحہ حکومت کی خود مختاری متاثر ہو گی۔ تاہم انہوں نے کہا کہ ان کی حکومت سعودی اتحاد کے ساتھ مذاکرات کرنے کو تیار ہے۔ سعودی عرب، متحدہ عرب امارات، بحرین اور مصر نے دوحہ حکومت سے تیرہ مطالبات کیے ہیں، جن میں الجزیرہ ٹیلی وژن چینل کی بندش بھی شامل ہے۔