نئی دہلی: ۱۸؍ستمبر (پریس ریلیز)  ملک کی مشہور سیاسی و سماجی شخصیت جناب الحاج ڈاکٹر قمرالاسلام صاحب سابق وزیر حکومت کرناٹک ایک مختصر علالت کے بعد بنگلور کے ایک اسپتال میں انتقال کرگئے، انا للہ وانا الیہ راجعون، ان کے انتقال پر آل انڈیا مسلم پرسنل لا بورڈ کے جنرل سکریٹری حضرت مولانا محمد ولی رحمانی صاحب نے اپنے تعزیتی بیان میں فرمایا کہ الحاج مرحوم قمرالاسلام صاحب قوم کے بڑے ہمدرد اور مخلص آدمی تھے، انسانیت کی فلاح ان کی زندگی کا لازمی حصہ تھا ان کا انتقال ملت کا بڑا خسارہ ہے۔ آپ چھ مرتبہ کرناٹک اسمبلی کے ایم ایل اے اور ۱۹۹۹ء تا ۲۰۰۴ء پھر ۲۰۱۳ء تا ۲۰۱۶ء وزارت اوقاف اور اقلیتی امور کے وزیر بھی رہے اور اپنی وزارت کے دوران بھی آپ نے بڑے اہم کام انجام دیئے۔

جنرل سکریٹری بورڈ نے مزید فرمایا کہ آپ ایک مرتبہ رکن پارلیمان بھی منتخب ہوئے ملک کی ملی تنظیموں، جماعتوں اور ان کے ذمہ داروں سے بہت ہی گہرا تعلق رکھتے تھے اور ہر معاملہ میں پیش پیش رہتے تھے، اس وقت بھی آپ کرناٹک اسمبلی کے اہم رکن رکین تھے، انتہائی سنجیدہ اور ملی مسائل پر متفکر رہتے تھے، ان کی موت سے ایک بڑا خلا پیدا ہوا ہے۔ اللہ ان کی مغفرت فرمائے اور ان کے درجات بلند فرمائے۔