پتور:پڑوسی نوجوان کے عشق میں مبتلا 2بچوں کی ماں اپنے عاشق کے ساتھ فرار۔ندی میں کود کر خودکشی کا جھوٹا ڈرامہ
پتور29؍نومبر (ایس او نیوز)پڑوسی نوجوان کے عشق میں دیوانگی کا مظاہرہ کرنے والی پتورکی ساروے گاوں کی جس خاتون کی کہانی کل پوسٹ ہوئی تھی، اس کے تعلق سے اب تازہ خبر یہ آئی ہے کہ وہ اپنے عاشق کے ساتھ فرار ہوگئی ہے
موصولہ رپورٹ کے مطابق اس نے گھر والوں کو گمراہ کرنے کے لئے فون پرنیتراوتی ندی میں کود کر جان دینے کی خبر سنائی تھی۔ گاؤں میں بدنامی کے ڈر سے گھر والوں نے چپ چاپ اپن انگڈی پہنچ کر وہاں نیتراوتی اور کمارا دھارا نامی ندیوں میں اس کی تلاش شروع کردی۔ بعد میں کچھ مقامی لوگوں اور نوجوان بھی تعاون کرتے ہوئے غوطہ خوروں کی مدد سے اس کو تلاش کرتے رہے۔ موبائل فون پر رابطہ کرنے پر اس نے فون بھی نہیں اٹھایا۔شام گئے تک کہیں بھی کوئی اتہ پتہ نہ ملنے سے پریشان ہوکر بالآخر اپن انگڈی پولیس اسٹیشن کے سب انسپکٹر نندا کمار کوا س کی جانکاری دی گئی تو انہوں نے پتہ لگایاکہ مذکورہ خاتون کا فون لوکیشن یہ بتارہا ہے کہ وہ کورگ کے ضلع کے سوموار پیٹ تعلقہ میں ماداپورا کے علاقے میں موجود ہے۔ جس سے اندازہ لگایاگیا کہ وہ اپنے عاشق کے ساتھ فرار ہوگئی ہے اور اپنی خود کشی کا جھوٹا ناٹک رچایا ہے۔
کئی گھنٹوں تک ندی کے آس پاس اور گہرے پانی میں غوطہ خوری کے ذریعے تلاشی مہم میں اپنا وقت اور محنت ضائع کرنے والے نوجوان اپنے آپ کو کوستے رہے کہ سب سے پہلے اس بات کی اطلاع پولیس کو نہ دے کر انہوں نے کیسی بھول کر ڈالی تھی۔