پتور22؍مارچ (ایس او نیوز) پتور کے کیّور گاؤں سے لاپتہ ہونے والی ایک نابالغ لڑکی کو پولیس نے چودہ دنوں کے بعد ڈھونڈنکالا اورلڑکی کو اغوا کرنے کے الزام میں آسام کے ایک شہری کو بنگلورو سے گرفتار کرلیا ہے۔

موصولہ رپورٹ کے مطابق 8مارچ کو کم عمر طالبہ اپنے گھر سے لاپتہ ہوگئی تھی اور اسی دن سے اختر حسین نامی میستری کاکام کرنے والا آسام کا شہری بھی غائب ہوگیا تھا۔لڑکی کے والد بھاسکر پجاری نے اختر حسین پر اپنی بیٹی کو اغوا کرنے کا شک ظاہر کرتے ہوئے پولیس میں شکایت درج کروائی تھی۔جس کے بعد سمپیا پولیس اسٹیشن میں کیس رجسٹر کیا گیا تھا۔

پولیس نے اختر حسین کوممکنہ ملزم مانتے ہوئے اپنی تحقیق و تفتیش آگے بڑھائی۔چونکہ اختر اور لاپتہ طالبہ دونوں ہی کے موبائل فونس بند تھے اس لئے انہیں ڈھونڈ نکالنے میں رکاوٹ پید اہورہی تھی۔پھر پولیس کو مصدقہ ذرائع سے ملنے والی خبروں کے مطابق تفتیش آگے بڑھائی گئی اور اغوا کی گئی لڑکی کو تلاش کرنے میں کامیابی ہوتے ہی ملزم اختر حسین کو بنگلورو سے گرفتار کرلیا گیاہے۔