پنجاب میں بھیڑ کا غیر انسانی سلوک ، ڈرگس اسمگلر کے ہاتھ پاؤں کاٹ ڈالے
بھٹنڈا، 9؍جون (ایس او نیوز؍آئی این ایس انڈیا )پنجاب کے بھٹنڈا میں ڈرگس اسمگلنگ کے مجرم ایک نوجوان کے ہاتھ اور پاؤں کاٹنے کا معاملہ روشنی میں آیا ہے۔ہاتھ پیر کاٹے جانے کے کچھ گھنٹوں بعد ہی نوجوان کی اسپتا ل میں موت ہو گئی۔25سالہ ونود کمارڈرگس اسمگلر تھا، جب وہ اپنے گاؤں لوٹا، تو کچھ لوگوں کے گروپ نے اس پر حملہ بول دیا، وہاں موجود لوگوں نے اس خوفناک منظر کو اپنے موبائل میں قید کرلیا ۔انسپکٹر جگدیش کمار نے کہاکہ وہ نارکوٹک ڈرگس اینڈ سائکوٹروپک سبسٹینس ایکٹ کے تحت کچھ معاملوں کا سامنا کر رہا تھا اور صرف 3-4دن پہلے ہی جیل سے باہر نکلا تھا۔ونود کمار کو مقامی اسپتا ل لے جایا گیا، جسے گاؤں والوں کی مشتعل بھیڑ نے گھیر رکھا تھا، گاؤں والوں کی وجہ سے اس کو وقت پر علاج نہیں مل پایا۔اس کے بعد پولیس اس شخص کو 45کلومیٹر دور فریدکوٹ لے گئی ،جہاں گہری چوٹوں کی وجہ سے اس کی موت ہوگئی۔اس معاملہ میں نامعلوم افراد کے خلاف قتل کا مقدمہ درج کر لیا گیا ہے۔گاؤں والوں کا کہنا ہے کہ وہ غصہ میں تھے، کیونکہ ڈرگس اسمگلنگ کی شکایات کے باوجود کوئی قدم نہیں اٹھایا جا رہا تھا۔قابل ذکر ہے کہ پنجاب میں ڈرگس ایک اہم مسئلہ ہے۔گزشتہ انتخابات میں سیاسی پارٹیوں نے اپنی تشہیری مہم میں اسے زور شور سے اٹھایا تھا۔کانگریس نے بھی اس مسئلے کو لے کر پچھلی حکومت پر تیزوتند حملہ بولا تھا۔پنجاب میں بے روزگاری اور معلومات کے فقدان میں نوجوان آسانی سے نشے کے جال میں پھنس جاتے ہیں۔
