نئی دہلی،12؍ اکتوبر (ایس او نیوز؍آئی این ایس انڈیا) ہریانہ کے پلول میں دو موٹر سائیکل سوار ایک پٹرول پمپ پر پٹرول لینے آئے۔پٹرول بھروانے کے بعد جب پیسے مانگے گئے تو بدمعاشوں نے سیلسمین کو گولی مار دی۔گولی لگنے کے بعد بھی بہادر سیلسمین بدمعاشوں سے مقابلہ کرتا رہا، لیکن تبھی بدماش نے اسے دوسری گولی مار دی۔سیلسمین نیچے گر گیا اور اس کی موت ہوگئی۔یہ مکمل واقعہ سی سی ٹی وی میں قید ہو گیا۔متوفی کا نام گجراج ہے جو پلول کی ددولا روڈ پر مہندر آئل نامی پیٹرول پمپ پر سیلسمین کی نوکری کرتاتھا۔پیر کو رات میں تقریباً 9 بجے گجراج اپنی ڈیوٹی پر تھا۔اسی دوران موٹر سائیکل پر سوار دو افراد پٹرول بھروانے آئے اور بعد میں کیش مانگنے پر گجراج سے بحث کرنے لگے۔اسی دوران ایک شخص نے گجراج کو گولی مار دی۔سی سی ٹی وی میں بھی صاف دکھائی دے رہا ہے گولی مارنے کے بعد موٹر سائیکل سواروں نے فرار ہونے کی کوشش کی لیکن گولی لگنے کے بعد بھی گجراج نے انہیں پکڑا اور گرا دیا۔ایک اور ملازم بھی آیا لیکن تبھی انہوں نے گجراج کو دوسری گولی مار دی۔اس واردات کو لے کر متوفی گجراج کا بیٹا امن، بھتیجا نیترپال سمیت گاؤں کے تمام لوگ پلول کی عدالت کے باہر دھرنے پر بیٹھے ہیں۔امن کا کہنا ہے پولیس کچھ نہیں کر رہی ہے۔انہیں شک ہے کہ سازش کے تحت ان کے والد کاقتل کروایاگیاہے جس میں پیٹرول پمپ کے مالک کا ہاتھ ہو سکتا ہے۔