بھٹکل 22/فروری (ایس او نیوز) کشمیر کے پلوامہ میں 14/فروری کو ہوئے دہشت گردانہ حملے میں 40 سے زیادہ  جوانوں کی موت پر سخت افسوس کا اظہار کرتے ہوئے اور واقعے کی سختی کے ساتھ مذمت کرتے ہوئے منکی کے عوام نے آج جمعہ کو ہوناور تحصیلدار کے معرفت  صدر ہند کے نام میمورنڈم پیش کیا جس میں  بتایا گیا ہے کہ دہشت گردانہ کاروائیوں  کو ہرگز بخشا نہیں جانا چاہئے۔

جماعت المسلمین منکی اور نوائط محلہ منکی  کے ساتھ ساتھ جماعت المسلمین ناخدا محلہ منکی کے بینر تلے  تحصیلدار دفتر میں میمورنڈم پیش کرنے کے دوران منکی کے کافی عوام اور ذمہ داران موجود تھے۔ میمورنڈم میں حکومت کو بتایا گیا ہے کہ ہم سب  اپنے بہادر جوانوں کی موت پر گہرے دکھ کا اظہار کرتے ہیں اور اُن کے گھروالوں کے ساتھ تعزیت کا اظہار کرتے ہیں۔ اس موقع پر دہشت گردی کو جڑ سے اُکھاڑ پھینکنے  کے لئے ہرممکن کوشش کئے جانے  کی بات کہی گئی اور واضح کیا گیا  ہم حکومت کے ساتھ کھڑے ہیں۔

جماعت کے صدر احمد باشہ نے تحصیلدار کو میمورنڈم سونپا، اس موقع پر  سکریٹری محمد ارشاد قاضی، حسن باپو حسن باپا، شبر کٹپاڈی، عبدالغفور، حنیف ڈانگی، ذاکر کٹنگری سمیت سو سے زائد لوگ موجود تھے۔