بنگلورو،28؍جنوری (ایس او نیوز) وزیر اعلیٰ سدارامیا نے کہا کہ پلس پولیو خوراک پروگرام میں محکمہ صحت وخاندانی بہبود کی کامیابی کانتیجہ ہی ہے کہ ریاست پولیو سے پاک ریاست بن چکی ہے۔ اپنے سرکاری رہائشی دفتر کرشنا میں پلس پولیو خوراک پروگرام کا افتتاح کرنے کے بعد اخباری نمائندوں سے بات کرتے ہوئے وزیراعلیٰ نے کہا کہ عالمی تنظیم صحت ( ڈبلیو ایچ او) نے بھی کرناٹک کو پولیو سے پاک ریاست کااعلان کرچکی ہے ۔ وزیر اعلیٰ نے کہا کہ حالیہ دنوں میں ریاست میں پولیو کا ایک بھی معاملہ دیکھنے میں نہیں آیاہے ۔ انہوں نے کہا کہ اگر بچوں کو پولیو سے محفوظ رکھنا ہو تو سال میں دومرتبہ پولیو خوراک لازمی طور پراپنے بچوں کو پلائیں۔ وزیراعلیٰ سدارامیا نے کہا کہ ریاستی حکومت پولیو خوراک کے لئے آندولن چلا رہی ہے اور اس سلسلہ میں عوامی بیداری لانے کے مقصد سے کئی پروگرامس جاری ہیں ۔ اس کیلئے 32,437پولیو مراکز قائم کئے گئے ہیں۔ اس کے علاوہ 51.972ٹیمیں تشکیل دی گئی ہیں۔ایک لاکھ 3ہزار 944کارکنان کا تقرر عمل میں لایا گیا ہے ۔ انہوں نے بتایا کہ 65,546نگراں کار اپنی ذمہ داری نبھا رہے ہیں ۔ 941موبائل ٹیمیں بھی تشکیل دی گئی ہیں تاکہ گھر گھر جا کر بچوں کو پولیو خوراک پلائیں۔انہوں نے بتایا کہ آشار آنگن واڈی ، کارکنان اورمحکمہ صحت و خاندانی بہبود کے ملازمین بھی اس پروگرام میں برابر حصہ لے رہے ہیں ۔ وزیر اعلیٰ نے بتایا کہ 11مئی کو دوسرے مرحلہ کے پلس پولیو خوراک پروگرام ہوگا ۔ گزشتہ 7برسوں سے ریاست پولیو سے آزاد ضرور ہوچکا ہے ،اس کے باوجود پولیو خوراک کاسلسلہ برابر جاری رہے گا۔ اس موقع پر محکمہ صحت کے افسران بھی موجود تھے۔