بنگلور۔14جنوری( ایس او نیوز ؍صدیق آلدوری) پلکیشی نگر اسمبلی حلقہ کے رکن اسمبلی اکھنڈ سرینواس مورتی نے آج اعلان کیا ہے کہ اس اسمبلی حلقہ کے تمام 7وارڈس کے اہم علاقوں میں جرائم کی روک تھام اور عوام کے تحفظ کیلئے 200سی سی ٹی وی کیمرے حساس علاقوں میں لگائے جانے والے ہیں۔اس حلقہ کے لئے حکومت نے 200سی سی ٹی وی کیمرے منظور کئے ہیں۔خوشحال نگر علاقہ میں آج سہیل نامی سماجی کارکن کی صورت میں تشکیل شدہ این جی او ایور گرین ریسی ڈنسی ویلفےئر ٹرسٹ کی افتتاحی تقریب سے خطاب کرتے ہوئے سرینواس مورتی نے کہا ہے کہ خوشحال نگر علاقہ میں 8کروڑ کی لاگت سے ایکہائی ٹیک اسپتال کی تعمیر کا کام جلد شروع کیا جانے والا ہے اس اسپتال کیلئے ان کے ایم ایل اے فنڈ سے 5کروڑ روپئے اور بی بی ایم پی سے 3کروڑ کی رقم منظور کی گئی ہے ۔ اس علاقہ میں نئی سیوریج لائن ڈالنے کا کام بھی شروع ہوچکا ہے اور کاویری کا پانی زیادہ مقدار میں فراہم کرنے کیلئے نئی لائن بچھائی جارہی ہے ۔فی الحال اس علاقہ کے لئے ہفتہ میں ایک دن کاویری کا پانی سپلائی کیا جارہا ہے اس نئی لائن کا کام مکمل ہونے کے بعد ہفتہ میں دو دن ۔نئے سال کے موقع پر شہر کے مختلف علاقوں سے عورتوں پر جنسی حملوں کی جو خبریں آنے لگیں تھیں اس کے بعد شہر میں جگہ جگہ سی سی ٹی وی کیمرے لگانے کا منصوبہ شروع کیا گیا ہے ۔ ان کے اسمبلی حلقہ کیلئے 200سی سی ٹی کیمرے منظور کئے گئے ہیں عوام اور سماجی تنظیموں کے مشوروں کے تحت اہم علاقوں میں یہ کیمرے لگائے جائیں گے ۔ انہوں نے عوام سے اپیل کی کہ وہ خوشحال نگر علاقہ میں عومی مسائل کے حل کیلئے اس نئے ٹرسٹ کے ذمہ داروں سے یا پھر علاقہ کی کارپوریٹر ام سلمیٰ قمر پاشاہ سے رابطہ رکھیں جنہیں علاقہ کے مسائل کا علم ہے اور وہ انہیں حل کروانے ان سے رجوع ہوسکتے ہیں ۔ سماجی کارکن قمر پاشاہ نے خطاب کرتے ہوئے کہا کہ انہیں بار ہا عوام سے شکایت ملی ہے کہ اس وارڈ میں گانجہ فروخت ہورہا ہے پولیس کے علم میں یہ بات لانے کے بعد یہاں پولیس سادہ لباس میں ایسے افراد کا پتہ لگانے کاکام کررہی ہے ۔ انہوں نے والدین سے کہا کہ وہ اپنے بچوں پر کڑی نظر رکھیں انہیں آوارہ لڑکوں کے ساتھ وقت گزارنے یا موبائل پر وقت گزار نے سے روک کر ان کی تعلیم پرتوجہ دینے کی ہدایت دیں۔ والدین سے یہ اپیل بھی کی گئی کہ اس وقت آر ٹی ای کے تحت بچوں کے داخلہ کے لئے آن لائن رجسٹریشن شروع ہوچکا ہے مقررہ وقت سے قبل آر ٹی ای سیٹ حاصل کرنے وہ درخواستیں داخل کریں ورنہ بعد میں داخلہ دلوانے میں پریشانی ہوگی ، کانگریس لیڈر ظفر اللہ نے بھی خطاب کیا ۔ ٹرسٹ کے صدر سہیل نے رکن اسمبلی کارپوریٹر ام سلمیٰ قمر پاشاہ اور حاصرین کا شکریہ ادا کیا۔