بنگلورو،12؍اکتوبر(ایس او نیوز) ریاستی وزیر برائے تعمیرات عامہ ایچ ڈی ریونا نے کہا ہے کہ بی جے پی والوں کو دیوے گوڈا خاندان کو گالی دئے بغیر کھانا ہضم نہیں ہوتا ، اسی لئے دیوے گوڈا خاندان کے متعلق وہ جو بھی کہنا چاہیں کہہ لیں اس کی انہیں کوئی پرواہ نہیں ہے۔

اخباری نمائندوں سے بات چیت کرتے ہوئے انہوں نے بتایاکہ بی جے پی والوں کے لئے ہر سویرے دیوے گوڈا خاندان کو یاد کئے بغیر ان کا دن نہیں گزرتا۔ اسی لئے بی جے پی کی طرف سے دیوے گوڈا خاندان پر جو بھی نکتہ چینی کی جاتی ہے اس کا جواب نہیں دیا جائے گا۔ یہ بی جے پی کی فطرت کا حصہ بن چکا ہے کہ دیوے گوڈا خاندان کو برا بھلا کہے۔اب ان کی اس فطرت کو کون بدل سکتا ہے۔

ہیماوتی آبی ذخیرے کے متعلق ٹمکور کے سابق رکن پارلیمان جی ایس بسوراج کے بیان پر سخت برہمی کا اظہار کرتے ہوئے انہوں نے کبھی ایسا نہیں کہا کہ ہیماوتی کے پانی کو موڑ کر ٹمکور اور منڈیا کی طرف بہایا جائے گا۔ میڈیا نے اگر اس سلسلے میں غلط تشہیر کی ہے تو اس کے لئے وہ جواب دہ نہیں ہے۔ انہوں نے کہا کہ جی ایس بسوراج کے ہاتھ میں ہیماوتی آبی ذخیرے کی چابیاں تھمادی جائیں گی وہ دن رات بیٹھ کر پانی کی نگرانی کریں۔ مرکز میں بی جے پی کی ہی حکومت ہے اس کے باوجود ہیماوتی کے نامکمل پراجکٹوں کی تکمیل کے لئے مرکز سے فنڈ لانے میں ناکام بی جے پی قائدین ریاستی حکومت پر غیر ضروری الزامات لگارہے ہیں۔

ریاستی وزارت سے این مہیش کے استعفے کے متعلق سوال پر ریونا نے کہاکہ اب تک یہ واضح نہیں ہوا ہے کہ مہیش نے استعفیٰ کیوں دیا ہے، پچھلے ساڑھے چار ماہ کے دوران محکمے کو انہوں نے عمدہ طریقے سے سنبھالے رکھا تھا۔ ایک صحافی کے اس تبصرے پر کہ مہیش کے قلمدان میں ریونا کی بے جا مداخلت سے ناراض ہوکر انہوں نے شاید استعفیٰ دیا ہوگا۔ اس موقع پر موجود ریونا ، وزیر برائے چھوٹی آب پاشی سی ایس پٹ راجیو اور وزیر چھوٹی صنعت اے سی سرینواس اور دیگر نے سخت برہمی ظاہر کی ۔ اور کہاکہ صحافیوں کو ذمہ داری سے بات کرنی چاہئے۔ غیر ضروری طور پر اس طرح کے اختلافات پیدا کرنا بند کریں۔ اس سوال پر کہ کیا مہیش کا استعفیٰ منظور کرلیا جائے گا ، ریونا نے سخت لہجے میں کہاکہ استعفیٰ منظور کرنا ہے یا نہیں یہ دیوے گوڈا اور کمار سوامی کا معاملہ ہے صحافی اپناکام ٹھیک ڈھنگ سے نبھائیں۔ غلط خبروں سے خود ان کی ساکھ متاثر ہوگی۔