عدالت نے نرسمہا کو بی سی سی آئی میں کرکٹ انتظامیہ تنازعہ حل کرنے کے لیے ثالث بنایا
نئی دہلی، 14 مارچ(ایس او نیوز؍آئی این ایس انڈیا) سپریم کورٹ نے جمعرات کو بی سی سی آئی کے معاملے میں انصاف دوست کا کردار ادا کر رہے سینئر وکیل پی ایس نرسمہا کو کرکٹ انتظامیہ سے متعلق تمام تنازعات کو حل کرنے کے لئے ثالث مقرر کیا۔جسٹس ایس اے بوبڑے اور جسٹس اے ایم سپرے کی بنچ کو نرسمہا نے مطلع کیا کہ عدالت کے سابق جج ڈی کے جین نے بی سی سی آئی کے لوک پال کا عہدہ قبول کر لیا ہے۔بنچ نے کرکٹ انتظامیہ میں تنازعات کو حل کرنے کے لیے نرسمہا کو ثالث کے طور پر کام کرنے کے لیے کہتے ہوئے تبصرہ کیا ’کھیل جاری رہنا چاہئے‘۔بنچ نے نرسمہا کو منتظمین کی کمیٹی کی طرف سے مختلف کرکٹ ایسوسی ایشن کو فنڈز دینے سے متعلق تنازعات پر بھی غور کرنے کی ہدایت دی۔بنچ نے اس کے ساتھ ہی ملک کی سبھی عدالتوں کو بی سی سی آئی اور ریاستی کرکٹ ایسوسی ایشن سے متعلق کسی بھی معاملے میں کارروائی کے لیے درخواست پر غور کرنے سے روک دیا ہے۔