غریب خاندانوں کو نئی ٹیکنالوجی کے ذریعہ مکانات کی فراہمی : کرشنپا
بنگلورو،24؍اکتوبر(ایس او نیوز) شہر بنگلور کے علاقوں میں بی پی ایل راشن کارڈ رکھنے والے غریب خاندانوں کو آدھار کار ڈکی بنیاد پر جی ایف آر جی ٹیکنالوجی سے مکانات تعمیر کرکے مہیا کرائے جائیں گے۔ یہ بات آج وزیر ہاؤزنگ ایم کرشنپا نے کہی۔ شہر کے بنگلور نارتھ تعلقہ میں آنے والے چک بٹ ہلی میں راجیو گاندھی ہاؤزنگ اسکیم کے تحت جی ایف آر جی ٹیکنالوجی کے استعمال سے گیسٹ ہاؤز کی تعمیر کیلئے سنگ بنیاد رکھنے کے بعد انہوں نے کہاکہ راجیو گاندھی ہاؤزنگ اسکیم کے تحت سال رواں کے اختتام تک چھ لاکھ مکانات کی تعمیر ریاست بھر میں مکمل کرنے کا نشانہ طے کیاگیا ہے۔ ساتھ ہی دیوراج ارس ہاؤزنگ اسکیم کے تحت معذورین کو 20ہزار مکانات تعمیر کرکے مہیا کرائے جائیں گے۔ مسٹر کرشنپا نے بتایاکہ جی ایف آر جی ٹیکنالوجی سے تعمیر مکانات آفات سماوی ، زلزلہ وغیرہ سے محفوظ رہیں گے۔ ان مراحل میں ایسے مکانات کو نقصان بھی کافی کم ہوگا۔آسٹریلیا، جاپان وغیرہ میں اس ٹیکنالوجی کا استعمال کامیابی کے ساتھ کیاگیا ہے۔ انہوں نے کہاکہ حکومت کی طرف سے اپنائی گئی ہاؤزنگ پالیسی کے تحت غریب خاندانوں کو انتہائی کم لاگت پر یہ مکانات تعمیر کرکے مہیا کرائے جائیں گے۔ایک مکان کی قیمت اس ٹیکنالوجی کے استعمال پر 24035 روپے آتی ہے۔اگلے دو ماہ میں اس ٹیکنالوجی کے ذریعہ مکانات کی تعمیر کو مکمل کرلیا جائے گا۔ اس موقع پر یلہنکا کے رکن اسمبلی ایس آر وشواناتھ اور دیگر موجود تھے۔