منگلورو16؍اپریل (ایس اونیوز) جموں کے کٹھوا میں ۸ سالہ آصفہ کے ساتھ عصمت دری اور قتل کرتے ہوئے جس درندگی کا مظاہر ہ کیا گیا تھااور یو پی کے اناؤ میں بی جے پی رکن اسمبلی اوراس کے ساتھیوں کی طرف سے گینگ ریپ کا جومعاملہ پیش آیا ہے، اس کی مذمت میں منگلورو میں اپنے منھ پر کالی پٹیاں باندھ کر عوام نے احتجاج کیا ۔
جنوبی کینرا مسلم اداروں کے فیڈریشن کی طرف سے جنوبی کینرا کے ڈپٹی کمشنر دفتر کے سامنے اس خاموش مذمتی اور احتجاجی مظاہرے کا اہتمام کیا گیاتھا۔ احتجاجیوں نے ڈی سی کی معرفت صدر جمہوریہ ہند کو میمورنڈم پیش کیا۔جس میں ملزموں کے خلاف کڑی سے کڑی قانونی کارروائی کرنے اور متاثرین کو انصاف دلانے کا مطالبہ کیا گیا ہے۔
اس احتجاجی مظاہرے میں سابق میئر کے اشرف، مصطفی سی ایم، احمد باوا، حمید کدرولی، ایڈوکیٹ حنیف الال، پی یو سی ایل کے ضلعی صدر کبیر الال، مسلم لیگ یوتھ ونگ کے ضلع صدر صدیق تلپاڈی، ایس ڈی پی آئی ضلعی صدرعطاء اللہ جوکٹے، بیاری اکیڈیمی کے رکن حسین کاٹی پلا، سی پی ایم لیڈر سنیل کماربجال،پی ایف آئی ضلعی صدر نوازا لال اور دیگر افراد موجود تھے۔