منگلورو میں ٹیپو جینتی کے خلاف احتجاج۔ 70سے زائد ہندوتوادی کارکنان کو پولیس نے لیا حراست میں؛ مڈکیری اور کورگ میں بھی گرفتاریاں
منگلورو 10؍نومبر (ایس او نیوز) سرکاری طور پر ٹیپو جینتی منانے کے خلاف اپنے منصوبے کے مطابق فرقہ پرست ہندوتنظیموں نے منگلورو اور اڈپی وغیرہ میں احتجاجی مظاہروں کا اہتمام کیا تھا جس کے نتیجے میں پولس نے کئی لوگوں کو حراست میں لیا ہے۔ ذرائع سے ملی اطلاع کے مطابق قریبی علاقوں کورگ اور مڈکیری میں بھی بی جے پی سمیت دیگر شدت پسند تنطیموں کے کئی لوگوں کو حراست میں لیا گیاہے۔
حالانکہ پولیس نے پوری ریاست میں امتناعی احکامات جاری کررکھے تھے اور کسی بھی قسم کے احتجاجی یا حمایتی جلو س اور عوامی مظاہرے پر پابندی لگی ہوئی تھی۔ اس کے باوجود منگلورو میں سب سے پہلے بی جے پی مائناریٹی مورچے کے لیڈر فرانکلین مونٹیئرو نے تنہا ایک کالا جھنڈا اٹھاکر ٹیپو جینتی کے خلاف احتجاج کرنے کی کوشش کی تو پولیس نے اسے گرفتار کرلیا۔
خیال رہے کہ فرانکلین نے گزشتہ سال بھی اسی طرح کا احتجاج کیا تھا۔ اس کے بعد بجرنگ دل اور وشو ا ہندوپریشد کے کارکنان کے ساتھ شرن پمپ ویل نے کالے جھنڈوں کے ساتھ احتجاجی مظاہرہ کیاتو پولیس نے انہیں بھی گرفتار کرلیا۔ اس کے تھوڑی دیر بعد سری رام سینا کے کارکنان احتجاج کے لئے سڑکوں پر اترے تو پولیس نے ان کو بھی حراست میں لے لیا۔ اس طرح ہندوتوا وادی تنظیموں سے وابستہ 70سے زیادہ کارکنان کو پولیس حراست میں لیے جانے کی اطلاع ہے۔
اڈپی سے ملنے والی خبروں کے مطابق وہاں پر ٹیپو جینتی کے خلاف مظاہرہ کرنے والے ہندوتنظیموں کے تقریباً12کارکنان کو حراست میں لیا گیا ہے۔ پولیس نے منگلورو اور اڈپی میں بھاری حفاظتی بندوبست کررکھا تھا جس کی وجہ سے کسی بھی قسم کا تشدد یا ناخوشگوار واقعہ پیش نہیں آیا ہے۔
پڑوسی علاقوں کورگ اور مڈکیری میں بھی بی جے پی اور اس کی ہمنوا تنطیموں کی جانب سے ٹیپو سلطان جینتی کو لے کر احتجاج منظم کرنے کی کوشش کی گئی تو وہاں پر بھی کئی لوگوں کو حراست میں لئے جانے کی اطلاعات ہیں۔کورگ سے ملنے والی اطلاعات کے مطابق جیسے ہی ڈپٹی کمشنر سری ویدیا نے بتایا کہ ضلع کورگ میں ٹیپو جینتی کے موقع پر سخت حفاظتی انتطامات کئے گئے ہیں اور قانون کو ہاتھ میں لینے کی کسی کو بھی اجازت نہیں دی جائے گی، بی جے پی ورکروں نے ڈی سی آفس کے احاطے میں ٹیپو جینتی کی مخالفت میں احتجاج کرتے ہوئے نعرے بازی شروع کی، جس کے بعد اُن کارکنوں کو گرفتار کرلیا گیا۔