بنگلورو یکم اگست(ایس او نیوز) ریاستی وزیر برائے سماجی بہبود پریانک کھرگے نے علاحدہ شمالی کرناٹک کے مطالبے کو مسترد کردیا اور کہا ہے کہ شمالی کرناٹک کی ترقی کے لئے جو بھی تحریک چلائی جائے گی اس کا وہ ساتھ دیں گے، لیکن علاحدہ ریاست کی تشکیل کے مطالبے کی حمایت کبھی نہیں کی جائے گی۔ انہوں نے کہاکہ متحدہ کرناٹک کے قیام کے لئے بہت ساری قربانیاں دی گئی ہیں۔ ان قربانیوں کو ضائع ہونے نہیں دیا جائے گا۔وہ لوگ جو ان قربانیوں سے ناواقف ہیں وہی علاحدہ ریاست کی تشکیل کے مطالبے کو ہوا دینے کی کوشش کررہے ہیں۔ پریانک کھرگے نے کہاکہ علاحدہ شمالی کرناٹک کی تشکیل کا مطالبہ کسی کا ذاتی ایجنڈا ہوسکتا ہے، ریاست کی تمام سیاسی جماعتیں کبھی ایسی تحریک کو قبول نہیں کریں گی۔ پریانک کھرگے نے کہا کہ حیدرآباد کرناٹک علاقے کی ترقی کے لئے ٹھوس قدم نہ اٹھائے جانے کی شکایت کافی عرصے سے ہے ، اسی مطالبے کو لے کر کانگریس بھی برسوں جدوجہد کرچکی ہے،جس کے بعد اس علاقے کی ترقی کے لئے آئین کی دفعہ 371J کے تحت خصوصی درجہ عطاکیاگیا۔ اس ترمیم کے نفاذ کے بعد شمالی کرناٹک کی ترقی کی رفتار میں کئی گنا تیزی آئی ہے۔ اس حقیقت کو نظر انداز کرتے ہوئے علاحدہ ریاست کامطالبہ کرنا درست نہیں۔ انہوں نے کہاکہ حیدرآباد کرناٹک میں روزگار اور تعلیم کے شعبوں کے لئے بجٹ میں کثیر رقم فراہم کی گئی ہے۔ اس کے باوجود بھی یہ شکایت کہ اس علاقے کو نظر انداز کیاگیا ہے درست نہیں ۔ وزیر اعلیٰ کمار سوامی کی طرف سے بلگاوی کو کرناٹک کی دوسری راجدھانی بنانے کی تجویز سے لاعلمی ظاہر کرتے ہوئے پریانک کھرگے نے کہاکہ شہروں کو راجدھانی بنانا ان کی ترقی کا ضامن نہیں بن سکتا بلکہ ان شہروں کو ترقی دینے کے لئے ٹھوس قدم اٹھانا ضروری ہے۔