بنگلورو،18؍اکتوبر (ایس او نیوز؍عبدالحلیم منصور) نجی اسپتالوں میں زچگی کے مرحلے میں خواتین اور ان کے رشتہ داروں کو بھاری رقم حاصل کرنے کیلئے ہراساں کئے جانے کیلئے اور نارمل زچگی کو آپریشن کے ذریعہ جبراً کروانے کی حرکت کو وزیر صحت رمیش کمار نے لوٹ قرار دیا۔ شہر میں محکمۂ آیوش کے زیر اہتمام منعقدہ قومی یوم آیورویدا تقریبات سے خطاب کرتے ہوئے انہوں نے کہا کہ پچھلے کچھ دنوں سے دیکھا جارہا ہے کہ زچگی کے مرحلے میں اسپتال حاملہ خاتون کو مناسب علاج مہیا کرواکر اس کی نارمل زچگی کروانے کی بجائے اس موقع کا غلط فائدہ اٹھاتے ہیں اور اس کے رشتہ داروں سے بھاری رقم حاصل کرکے آپریشن سے زچگی کرواتے ہیں ۔ ان کی نظر میں یہ دھندا جیب کترنے کے مترادف ہے۔ وزیر موصوف نے کہاکہ سرکاری اسپتالوں میں بہترین ڈاکٹرس اور جدید ترین سہولیات کم شرحوں پر مہیا ہونے کے باوجود بھی لوگ ان اسپتالوں کا رخ نہیں کرتے ۔نجی اسپتالوں میں جاکر دھوکے کھاتے ہیں۔ انہوں نے کہاکہ نجی اسپتالوں میں ڈاکٹر اپنی چکنی چپڑی باتوں سے مریضوں کو گاہکوں کی طرح پھسلا دیتے ہیں۔ جبکہ سرکاری اسپتالوں میں ڈاکٹرس اور عملے کا لہجہ بعض اوقات مریضوں اور ان کے رشتہ داروں کیلئے ناگوار ہوتاہے۔انہوں نے سرکاری اسپتالوں کے ڈاکٹروں سے مخاطب ہوکر مشورہ دیا کہ مریضوں کے تئیں دوستانہ رویہ اپنائیں۔