جواد ظریف ایرانی نظام کے جرائم چْھپانے کی ناکام کوشش کر رہے ہیں : خالد بن سلمان
تہران 6جولائی (ایس او نیوز؍ آئی این ایس انڈیا )امریکا میں سعودی عرب کے سفیر شہزادہ خالد بن سلمان کا کہنا ہے کہ جب بھی ایرانی نظام کی دہشت گرد سرگرمیوں کا انکشاف ہوتا ہے تو تہران حسب عادت اپنے بے قصور ہونے کا دعوی کرتا ہے۔
ایرانی وزیر خارجہ کے بیان پر جواب دیتے ہوئے جمعرات کے روز اپنی ٹوئیٹ میں شہزادہ خالد نے کہا کہ "ہمیں چاہیے کہ خطّے اور دنیا بھر میں دہشت گردی اور انارکی کو سپورٹ کرنے کے حوالے سے اس نظام کی طویل تاریخ کو نہ بْھولیں۔سعودی سفیر نے باور کرایا کہ "آسٹریا میں جو کچھ ہوا وہ ایرانی جرائم کے طویل سلسلے کا حصّہ ہے۔
جواد ظریف محض ایک ماسک ہے جو ایرانی نظام کے جرائم کو چْھپانے کی کوشش کر رہے ہیں۔ ایرانی وزیر خارجہ جواد ظریف نے فرانس میں بم حملے کی منصوبہ بندی کے شْبہے میں آسٹریا میں بیلجیئم کے حکام کے ہاتھوں ایک سفارت کار کی گرفتاری کو "جعلی منصوبہ" قرار دیا تھا۔ ایرانی وزیر خارجہ نے ٹوئیٹر پر لکھا کہ "ایران کسی بھی جگہ تشدد اور دہشت گردی کی تمام صورتوں کی قطعی مذمت کرتا ہے۔ ایران تمام متعلقہ فریقوں کے ساتھ کام کرنے کے لیے تیار ہے تا کہ ایک جعلی اور بد نیتی پر مبنی منصوبندی کو بے نقاب کیا جا سکے ۔
اس سے قبل بلجیم کی استغاثہ نے ایک دہشت گرد حملہ ناکام بنا دینے کا اعلان کیا تھا۔ منصوبہ بندی کے مطابق پیرس میں 30 جون کو ایرانی حزب اختلاف "قومی کونسل برائے ایرانی مزاحمت" تنظیم کی کانفرنس کو نشانہ بنایا جانا تھا۔بلجیم کے استغاثہ کے مطابق حملے کی کارروائی کا ناکام بنائے جانے کے دوران برسلز میں بیلجین شہریوں اور آسٹریا میں ایک ایرانی سفارت کار کو حراست میں لیا گیا جب کہ فرانس میں بھی بعض افراد کو مورد الزام ٹھہرایا گیا ہے۔بلجیم کے حکام کے مطابق ایرانی سفارت کار کی پیدائش کا سال 1971ء4 ہے اور وہ آسٹریا کے دارالحکومت ویانا میں ایرانی سفارت خانے میں کام کرتا ہے۔