بنگلورو10؍جولائی(ایس او نیوز) ریاستی وزیر برائے دیہی ترقیات کرشنا بائرے گوڈانے کہا ہے کہ پچھلے چار سال کے دوران ریاست میں وزیر اعظم گرام سڑک یوجنا کے تحت 1237 دیہاتوں کو سڑکوں سے جوڑا گیا ہے۔ آج ریاستی لیجسلیٹیو کونسل میں وقفۂ سوالات کے دوران بی جے پی کے ایل روی کمار کے سوال کا جواب دیتے ہوئے انہوں نے کہاکہ چار سال کے دوران مرکزی حکومت نے اس اسکیم کے لئے 630کروڑ روپیوں کا گرانٹ فراہم کیا ہے جس کو مکمل طور پر استعمال کیا گیا ہے۔اس میں سے کوئی بھی رقم مرکزی حکومت کو لوٹائی نہیں گئی۔اس اسکیم کے تحت2399.4 کلومیٹر سڑک کی تعمیر ہوئی ہے۔ وزیر موصوف نے بتایاکہ وزیراعظم گرام سڑک یوجنا کے تحت مرکزی حکومت کی حصے داری 60 فیصد اور ریاستی حکومت کی 40 فیصد ہوتی ہے۔ بجٹ کے تحت ریاستی حکومت کی طرف سے جو حصہ متعین ہے وہ جاری کردیا گیا ہے۔ انہوں نے کہاکہ سڑکوں کی دیکھ بھال کے لئے 110 کروڑ روپیوں کاگرانٹ جاری کیاگیا ہے۔مرکزی حکومت نے کرناٹک میں ان سڑکوں کی دیکھ بھال کے اعتبار سے ریاست کو بہترین ہونے کا درجہ عطا کیا ہے۔