نئی دہلی، 16؍جون(ایس او نیوز؍آئی این ایس انڈیا )مرکزی وزیر داخلہ راج ناتھ سنگھ اورشہری ترقیات کے مرکز ی وزیر وینکیا نائیڈو جمعہ کو صبح 11بجے صدارتی انتخابات میں امیدوار کو لے کر اتفاق رائے بنانے کے لیے کانگریس کی صدر سونیا گاندھی سے 10جن پتھ پر واقع ان کی رہائش گاہ پر ملاقات کی، حالانکہ یہ ملاقات بغیر کسی نتیجے کے ہی پوری ہوئی۔سونیا اور راجناتھ، نائیڈو کے درمیان یہ ملاقات تقریبا 30منٹ تک جاری رہی،میٹنگ میں کانگریس لیڈر غلام نبی آزاد اور ملکا ارجن کھڑگے بھی شامل رہے۔میٹنگ کے بعد آزاد اور کھڑگے نے کہا کہ دونوں بی جے پی لیڈروں نے صدر کے لیے کسی امیدوار کا نام نہیں پیش کیا،کانگریسی لیڈروں نے کہا کہ بی جے پی لیڈروں نے کانگریس سے ہی صدراتی امیدوار کا نام پوچھا۔کانگریس لیڈروں کے بیانات سے الگ کانگریس کے ذرائع بتاتے ہیں کہ سونیا گاندھی نے بی جے پی لیڈروں کو کوئی سیدھا جواب نہیں دیا بلکہ پہلے وہ دوسرے اپوزیشن رہنماؤں سے بی جے پی کے امیدوار کو لے کر بحث کریں گی اور پھر اپنا جواب دیں گی ۔مانا جا رہا ہے کہ اپوزیشن پارٹیوں کے لیڈروں کی میٹنگ 20یا 21؍جون کو ایک بار پھر ہو سکتی ہے۔اس میں سونیا گاندھی اور اپوزیشن لیڈر مل کر ایک بار پھر صدارتی انتخابات پر غوروخوض کریں گے۔قابل ذکر ہے کہ صدارتی انتخابات کے لیے بی جے پی اپنے امیدوار کا اعلان کرنے سے پہلے ہر پارٹی سے اتفاق رائے بنانے کے لیے بات چیت کر رہی ہے۔اس کے لیے بی جے پی صدر امت شاہ کی طرف سے بنائی گئی کمیٹی نے بڑی پارٹیوں سے بات چیت کرنی شروع کر بھی دی ہے، وہیں علاقائی پارٹیوں کو ہم خیال کرنے کی ذمہ داری این ڈی اے اتحادکے دوسرے لیڈروں کو دی گئی ہے۔