تحریروتقریر کی مشق درسیات کا اہم باب ہے،اسے نصاب تعلیم سے خارج نہ سمجھیں:شمس تبریز قاسمی
دیوبند27 اگست (سمیر چودھری/ایس او نیوز) داخل نصاب کتابوں میں مہارت حاصل کرنے اور درسیات پر مکمل توجہ دینے کے ساتھ تحریر تقریر کی مشق بھی انتہائی ضروری ہے،تحریر وتقریر میں مہارت حاصل کرنا،اس شعبہ میں محنت کرنا درسیات کاہی جز ہے،یہ نصاب تعلیم کا حصہ ہے کیوں کہ سلیس اور شگفتہ زبان جانے بغیر آپ کامیاب اور مقبول مدرس نہیں بن سکتے ہیں تو وہیں مذہب اسلام کو دوسروں تک پہونچانے، قرآن وحدیث اور فقہ کے پیغام سے دوسروں کو روشناس کرانے کیلئے قلمی صلاحیت سے لیس ہونا ضروری ہے،ان خیالات کا اظہار دارالعلوم دیوبند میں زیر تعلیم طلبہ مظفر پور،سیتامڑھی،ویشالی وشیوہرکی انجمن نادیۃ الاصلاح کے افتتاحی پروگرام سے ملت ٹائمز کے چیف ایڈیٹر نوجوان صحافی شمس تبریزقاسمی نے کیا، انہوں نے طلبہ کو دوست کہہ کر مخاطب کرتے ہوئے کہاکہ آپ طالب علمانہ زندگی میں انجمن کے پروگرامس کو اہمیت دیں،اس میں لازمی شرکت کریں،انجمن کے تحت نکلنے والے پرچے میں لکھنے کا اہتمام کریں،مجھے ان انجمنوں سے بہت معاونت ملی ہے،میں نے لکھنے اور پڑھنے کا ہنر انہیں انجمنوں سے سیکھاہے۔مفتی شمس تبریز قاسمی نے جامعۃ الشیخ حسین احمد المدنی میں طلبہ کی انجمن سے خطاب کرتے ہوئے بھی انہیں زبان وادب پر توجہ دینے کی نصیحت کی اور کہاکہ تحریروتقریر کی مشق کو خارج نصاب سمجھنے کے بجائے آپ درسیات کا اہم جز سمجھیں اور اس پر بھی توجہ،اس موقع پر سیتامڑھی کے طلبہ نے نوجوان صحافی شمس تبریز قاسمی کا خصوصی استقبال کیا اور کہاکہ ہمارے لئے قابل فخر ہے کہ وہ اس انجمن کے متحرک رکن رہے ہیں اور آج صحافت میں سرگرم کرداراداکررہے ہیں۔
اس موقع پر مولانا دارالعلوم وقف دیوبند کے استاذ مولانا سمیع الدین قاسمی صاحب نے بھی خطاب کرتے ہوئے کہاکہ علم دین سیکھنے کا مقصد دوسروں تک اسلام کو پہونچانا ہے اور اس کیلئے آپ کوئی بھی ذرائع استعمال کرسکتے ہیں۔پروگرام کی صدارت مولانا عباداللہ عمیس قاسمی صاحب استاذ جامعۃ الشیخ حسین احمد مدنی دیوبند نے کی،اس موقع پردہلی سے تشریف لائے مولانا عامر ظفر قاسمی بھی موجود تھے، کولکاتا سے تشریف لائے مولانا مختار صاحب کی دعاء پر پروگرام کا اختتام ہوا۔
قبل ازیں محمد عامر کی تلاوت کلام پروگرام کا آغاز ہوا،محمد حید ر نعت پیش کیا،وحید الزماں اور محمد تنویر نے تقریر پیش کی،ناظم انجمن راشد انور تحریک صدارت پیش کیا،صدر انجمن عاصم جمال نے خطبہ استقبالیہ پیش کیا جبکہ نظامت کا فریضہ محمد امام الدین نے انجام دیا۔
