بنگلور۔23اپریل (ایس او نیوز؍ صدیق آلدوری)ریاستی کابینہ کے خالی عہدوں کی بھرتی اس مہینہ میں کئے جانے کے جو امکانات تھے اب ان میں تاخیر ہوسکتی ہے۔وزیراعلیٰ سدارامیا جو اس سلسلہ میں ہائی کمان سے مشورہ کے لئے دہلی گئے ہوئے تھے ۔ وہ آج دن بھر وزیراعظم کی جانب سے طلب کردہ وزراء اعلیٰ کی قیادت میں منعقدہ نیتی آیوگ کے اجلاس ہی میں مصروف رہے ۔ یہ اجلاس جس میں ملک بھر کی ریاستوں کے وزراء اعلیٰ شریک ہیں آج کافی دیر تک جاری رہا اور وزیراعلیٰ سدرامیا دہلی کے کانگریس قائدین سے آج ریاستی کابینہ میں توسیع کے مسئلہ پر بات چیت نہیں کرپائے ۔آج وزیراعظم کی طلب کردہ نیتی آیوگ کانفرنس میں جی ایس ٹی بل، کاشت کاروں کی معاشی ترقی ، ڈجیٹل انڈیا اور دیگراہم امور پرکافی دیر تک بحث جاری ہے ۔ وزیراعلیٰ سدارامیا اس کانفرنس میں شرکت کیلئے گزشتہ رات ہی دہلی روانہ ہوگئے تھے او رریاست میں سیاسی حلقوں میں یہ قیاس آرائیاں جاری تھیں کہ آج وہ کانگریس ہائی کمان لیڈروں سے بھی ملاقات کریں گے ۔ اور ریاستی کابینہ کے خالی عہدوں کی بھرتی سے متعلق ان لیڈروں سے مشورہ اور منظوری حاصل کریں گے ۔ خود سدارامیا نے بھی دو دن قبل کہا تھا کہ اس مہینہ کابینہ کے خالی عہدے بھرتی کرنے کے سلسلہ میں وہ دہلی کے پارٹی لیڈروں سے ملاقات کرنے والے ہیں ۔ یہ اجلاس آج دیر تک جاری رہنے سے وہ ہائی کمان لیڈروں سے ملاقات کئے بغیر ہی بنگلورلوٹنے والے ہیں۔