ماسکو26جنوری (ایس او نیوز؍ آئی این ایس انڈیا )یوں تو دنیا کے ہر ایک خطہ میں انٹر نیٹ کا پاپ پہنچ چکا ہے اور اس کو لوگ اپنے اپنے طریقے سے استعمال کرتے ہیں ؛ لیکن یہ بات نہایت افسوسناک ہے کہ اب اسی سوشل میڈیا کو جھوٹے پروپیگنڈہ، ہراسانی ، تحقیر ،اشتعال ، فساد فی الارض وغیرہم کے لیے استعمال کیا جانے لگا۔ ٹھیک اسی طرح کی کارستانی اب سیاسی جماعتیں بھی اپنے حریف کو زیر کرنے اور عوامی توجہ حاصل کرنے کے اس کا استعمال کرنے لگے اور اس کے ذریعہ جھوٹ کی اشاعت و ترسیل میں شیطان کی نیابت کی جانے لگی ۔ تاہم اب لگتا ہے کہ دیر نشینوں اور چلہ کشوں کو بھی اس کی ستم خیزی کا علم ہوچکا ہے اسی تناظر میں پا پ فرانسس نے سو شل میڈیا پر جعلی خبروں کی تشہیر کو قابل مذمت قرار دیا ہے اور میڈیا پر زور دیا ہے کہ وہ اپنے کام کو مشن سمجھتے ہوئے ایسی خبروں کو روکیں۔ایک بیان میں پاپ فرانسس نے کہا کہ جعلی خبریں شیطانی فعل ہیں جن کی تشہیر سے سیاسی اور معاشی فوائد حاصل کئے جاتے ہیں اور اکثر ان کی تردید بھی ان سے ہونے والے نقصان کا ازالہ نہیں کر سکتیں۔انہوں نے کہا کہ ایسی خبروں کا نتیجہ نفرتوں کی صورت میں سامنے آتا ہے۔پاپ فرانسس نے لوگوں کی تربیت پر زور دیا تاکہ وہ سچائی اور حقیقت کو پہچان سکیں۔ان کا کہنا تھا کہ صحافیوں کو بریکنگ نیوز کی بجائے دنیا میں تنازعات کی وجوہات سامنے لانے پر کام کرنا چاہئے۔