پوپ فرانسس کی بین الاقوامی برادری سے روہنگیا مسلمانوں کی مدد کیلئے ٹھوس اقدامات کرنے کی اپیل

Source: S.O. News Service | By Shahid Mukhtesar | Published on 3rd December 2017, 8:00 PM | عالمی خبریں |

ڈھاکہ،3دسمبر ( ایس او نیوز؍آئی این ایس انڈیا)کیتھولک مسیحیوں کے روحانی پیشوا پوپ فرانسِس نے میانمار سے ہجرت کر کے بنگلہ دیش پہنچنے والے روہنگیا مہاجرین کی بابت اپنے موقف کو درست قرار دیا ہے۔ ہفتہ کے روز ڈھاکا سے روم روانگی کے وقت ایک انٹرویو میں انہوں نے کہا کہ روہنگیا کے دکھ جان کر ان کی آنکھیں بھر آئی تھیں۔ انہوں نے بین الاقوامی برادری سے بھی اپیل کی کہ روہنگیا افراد کی مدد کے لیے ٹھوس اقدامات کیے جائیں۔ خیال رہے کہ پوپ نے عوامی سطح پر روہنگیا کا نام لے کر ان کے ساتھ اظہار یکجہتی کیا تھا، جس پر بعض حلقوں کی جانب سے ان پر تنقید کی جا رہی تھی۔ساتھ ہی ساتھ پوپ فرانسس نے دورہ میانمار میں روہنگیا لفظ استعمال نہ کرنے کی وجہ بتادی۔ پوپ فرانسس نے دورہ میانمار میں روہنگیا لفظ استعمال نہ کرنے کی وجہ بتاتے ہوئے کہا ہے کہ ان سے کہا گیا تھا کہ لفظ روہنگیا استعمال کرنے سے ملک میں کشیدگی بڑھ سکتی ہے اور روہنگیا پناہ گزینوں کی واپسی کا دروازہ بند ہوسکتا ہے۔غیرملکی خبر رساں ادارے کے مطابق بنگلہ دیش سے اٹلی کے شہر روم واپس جاتے ہوئے پوپ فرانسس کا کہنا تھا کہ روہنگیا پناہ گزینوں سے ملاقات کی شرط پر میانمار اور بنگلا دیش کا دورہ کیا، دورے کا اصل مقصد میانمار حکام تک پیغام پہنچانا تھا۔ انھوں نے روہنگیا مسلمانوں کی حالت زار بیان کرتے ہوئے کہا کہ پناہ گزین بہت بری حالت میں ہیں جنہیں دیکھ کر میں آنسو ضبط نہیں کرسکا۔

قبل ازیں پوپ فرانسس نے بنگلہ دیش کے کاکس بازار کے مہاجر کیمپوں میں پناہ گزینوں سے خطاب کیا اور ان کے لیے نیک تمناوں کا اظہار کیا۔ پوپ فرانسس نے روہنگیا مسلمانوں سے کہا کہ وہ ان پر ظلم ڈھانے والوں کی طرف سے ان سے معذرت چاہتے ہیں، ان سب کی طرف سے جنہوں نے آپ کو تکالیف پہنچائیں، ان سب کی طرف سے جنہوں نے آپ کو نقصان پہنچایا، میں آپ سے معذرت چاہتا ہوں۔ہفتہ کو پوپ فرانسس نے میانمار اور بنگلہ دیش کا دورہ مکمل کر لیا ۔ اپنے دورے کے آخری دن انہوں نے بنگلہ دیش کے دارالحکومت ڈھاکا میں مدر ٹریسا کی قائم کردہ مذہبی تنظیم کی نگرانی میں چلنے والے ایک اسپتال کا دورہ بھی کیا۔ میانمار کی راکھین ریاست میں اگست کے آخر سے جاری عسکری آپریشن کے تناظر میں 6لاکھ سے زائد روہنگیا باشندے ہجرت کر کے بنگلہ دیش پہنچے ہیں۔جمعہ کو ان سے روہنگیا مہاجرین کے ایک نمائندہ گروپ نے ملاقات کی۔ اس اٹھارہ رکنی گروپ میں دو برقع پوش خواتین اور دو کم عمر بچے بھی شامل تھے۔ بنگلہ دیشی دارالحکومت میں ہونے والی اس ملاقات کے بعد پوپ فرانسس نے اپنی گفتگو میں پہلی مرتبہ روہنگیا مسلمانوں کا براہ راست تذکرہ کیا۔

ایک نظر اس پر بھی

چینی فضائیہ کے بمبار طیارے کی جنوبی چین میں جزیرے کے رن وے پر لینڈنگ

چین کی عوامی سپاہ آزادی کی فضائیہ نے حالیہ مشق کے دوران بحیرۂ جنوبی چین کے ایک ہوائی اڈے پر اپناایچ۔6بمبار طیارہ اتارا اس طرح چینی بمبار طیارہ اس علاقے میں کسی ہوائی اڈے کو استعمال کرنے والا پہلا طیارہ بن گیا ہے۔

بچوں سے جنسی زیادتیاں: چلی کے تمام 34 بشپس استعفیٰ پیش کرنے پر متفق 

کیتھولک مسیحیوں کے کلیسائے روم کی تاریخ میں شاذ و نادر نظر آنے والی ایک پیش رفت میں بچوں سے جنسی زیادتیوں کے ایک بہت بڑے اسکینڈل کی وجہ سے چلی کے تمام چونتیس بشپس نے پاپائے روم کو اپنے استعفوں کی پیشکش کر دی ہے۔

افغانستان: اسٹیڈیم میں دھماکے، آٹھ ہلاک

افغانستان کے مشرقی شہر جلال آباد میں کھیلوں کے ایک اسٹیڈیم میں دھماکوں سے کم از کم آٹھ افراد ہلاک ہو گئے ہیں۔افغان حکام کے مطابق جمعہ کو دیر گئے اس اسٹیڈیم میں ایک کرکٹ میچ ہونے جا رہا تھا جب یہ دھماکے ہوئے اور اس میں متعدد افراد زخمی بھی ہوئے۔