منگلورو: ماحول میں آلودگی پھیلائے بغیر کچرا جلانے کے نئے سسٹم کی تنصیب
منگلورو15؍دسمبر (ایس او نیوز) ریاست کرناٹکا میں پہلی بار ایک گرام پنچایت اورضلع پنچایت کے اشتراک سے کچرا نکاسی کے ایک ایسے نظام کی شروعات کی گئی ہے جس میں کچرا جلانے کی وجہ سے ماحول پر کوئی برا اثر نہیں پڑے گا۔
ریاست کے سب سے مالدار مندر والے شہر کُوکے سبرامنیا میں ویسٹ مینجمنٹ کے ایسے یونٹس نصب کیے گئے ہیں جو ایک دن میں 2,700کیلو گرام کچرا جلاکر خاک کردیتے ہیں۔ اس منصوبے کی جملہ لاگت 34لاکھ روپے آئی ہے۔ ’سوچھتا استرا‘ نامی اس یونٹ کی تنصیب مکمل ہوگئی ہے اور دو ایک دنوں میں یہ مشینیں کام کرنا شروع کردیں گی۔تعلقہ پنچایت رکن راجیش نے بتایا کہ اس طرح کا ویسٹ مینجمنٹ یونٹ منگلورو کے ایک نجی مال میں کام کررہا ہے، مگر بلدیاتی اداروں کی طرف سے ریاست میں پہلی بار ایسی کوشش سبرامنیا میں ہوئی ہے۔بھارت کارپوریشن کے مالک بھرت راج منڈولی نے بتایا کہ یہ مشینیں ایک گھنٹے میں 300کیلو گرام یا 24کیوبک میٹرس کچرا جلانے کی صلاحیت رکھتے ہیں۔ کچرے میں آگ بھڑکانے کے لئے ایندھن یا کیمیکل کا بھی استعمال نہیں ہوتا ہے۔ اس کے علا وہ کاربن ڈائی آکسائڈ ملا ہواپانی ری سائیکل کرکے دوبارہ استعمال کیا جاسکتا ہے، جبکہ کچرے کی راکھ کو کھیتی باڑی کے لئے کھاد کے طور پر استعمال کیا جاسکتا ہے۔