ٹمکور 16؍جنوری (ایس او نیوز)ایک شرمناک واقعے میں اسسٹنٹ سب انسپکٹر کے عہدے پر فائز ٹمکور دیہی پولیس اسٹیشن کے امیش نے دماغی طور معذورپر ایک خاتون کی عصمت دری کرڈالی۔

موصولہ تفصیل کے مطابق ٹمکور ایس پی ایشا پنت نے امیش سے تفتیش کے بعد اسے اپنے عہدے سے معطل کردیا ہے۔عوام میں یہ خبر گردش کررہی ہے کہ امیش نے دماغی طو ر پر معذوراس خاتون کی عصمت دری پولیس جیپ کے اندر ہی کی ہے جبکہ پولیس ایس پی کا کہنا ہے کہ یہ واردات ایک نجی موٹر گاڑی میں انجام دی گئی ہے۔لیکن ایس پی نے اخباری نامہ نگاروں کے اس سوال کا جواب دینے سے انکار کردیا کہ اس واردات کے موقع پر گاڑی کی ڈرائیونگ کون کررہا تھا۔ایس پی نے بس اتنا کہا کہ یہ ایک نہایت سنگین معاملہ ہے اور اس کی گہرائی سے جانچ ہونی چاہیے۔

اے ایس آئی کی ہوس اورعصمت دری کا شکار ہونے والی خاتون کے بھائی نے اخباری نمائندوں کو بتایا کہ سنیچر کی رات میں اے ایس آئی امیش نے رات کی پٹرولنگ کے دوران جب خاتون کو ایک پل کے پا س کھڑا پایا تو اس نے اس کوگھر پہنچانے کا کہہ کر اپنی گاڑی میں بٹھالیا۔ پھر اس کے ساتھ وہ عصمت دری کی کوشش کرنے لگا تو خاتون نے منت سماجت کی وہ ایسا نہ کرے ۔جب وہ نہ مانا تو خاتون نے مدد کے لئے شور مچانا شروع کیا۔ اس وقت امیش نے اس کا منھ بند کردیا اور دو بار عصمت دری کرنے کے بعد خاتون سے اس کے چھوٹے بھائی کافون نمبر لیا اوردو بار فون کرتے ہوئے پیغام دیا کہ و ہ آکر خاتون کو لے جائے کیونکہ وہ رات کے وقت بھٹکتی ہوئی پائی گئی ہے۔

لیکن تھوڑی دیر کے بعد خود امیش نے پولیس جیپ میں خاتون کو اس کے گھر کے قریب چھوڑا اور اس کی ماں اسے گھر لے گئی۔اس دوران مذکورہ خاتون مسلسل پولیس افیسر کو گالیاں بک رہی تھی۔ پھر ماں نے اس کی وجہ پوچھی تو اس نے ساری کہانی بتائی جس کے بعد خاتون کی ماں نے ٹمکور مہیلا پولیس اسٹیشن میں اتوار کی دوپہر کو شکایت درج کروادی۔پولیس نے معاملہ درج کرنے کے بعد اس خاتون کو میڈیکل جانچ کے لئے بھیج دیا۔پولیس افیسر کی ہوس کا شکار خاتون کے بھائی کا کہنا ہے کہ دماغی طور پر معذور اس کی بہن اکثر گھر سے نکل جایا کرتی تھی اور اپنے آپ ہی پھر سے واپس آجاتی تھی، یہی وجہ تھی کہ دیر رات تک اس کے گھر نہ لوٹنے کے معاملے کو گھر والوں نے زیادہ سنجیدگی سے نہیں لیا تھا۔