ہر پانچ کلومیٹر کیلئے ایک پولیس تھانہ کا قیام:ڈاکٹر پرمیشور
بنگلورو،27؍فروری(ایس او نیوز) عوام کو مناسب تحفظ فراہم کرنے اور نظم وضبط کی موثر نگرانی یقینی بنانے کیلئے ہر تین تا پانچ کلومیٹر کے دائرہ میں ایک پولیس تھانہ کے قیام کو یقینی بنایا جائے گا۔ اس کیلئے پولیس تھانوں کی از سر نو حد بندی کی جائے گی۔یہ بات آج وزیر داخلہ ڈاکٹر جی پرمیشور نے کہی۔آج شہر کے گروپن پالیہ میں نئے پولیس تھانہ کا افتتاح کرنے کے بعد خطاب کرتے ہوئے ڈاکٹر پرمیشور نے کہاکہ پہلے شہر میں دس تا پندرہ کلومیٹر کے رقبہ پر مشتمل ایک پولیس تھانہ ہوا کرتا تھا، اس سے انسداد جرائم میں کافی دشواری پیش آتی ، اسی لئے گزشتہ ایک سال سے پولیس تھانوں کی از سر نو حد بندی کا کام جاری ہے۔جہاں بھی افزود پولیس تھانوں کی ضرورت پڑ رہی ہے وہاں نئے تھانے قائم کئے جارہے ہیں اور ساتھ ہی اضافی سب ڈویژن بھی بنائے جارہے ہیں۔پچھلے ایک سال کے دوران شہر میں آٹھ نئے پولیس تھانے اور ایک سب ڈویژن بڑھایا گیا ہے۔ انہوں نے کہاکہ ایک اندازہ کے مطابق ہر پولیس تھانہ میں 300 تا 400مقدمات کی حد طے کی گئی ہے، اس سے زیادہ اگر مقدمات بڑھ گئے تو تھانہ کو تقسیم کردیا جائے گا۔ وزیر داخلہ نے بتایاکہ ریاستی پولیس میں بارہ ہزار افراد کی بھرتی کی گئی ہے، ہر سال چار تا پانچ ہزار افراد کی بھرتی کیلئے ضروری قدم اٹھائے جائیں گے۔ ریاست کے کسی پولیس تھانہ میں عملے کی کمی نہ ہو اس کیلئے بھرتی کے عمل کو تسلسل بخشا جائے گا۔ آج شہر کے شمال مشرقی علاقہ میں ڈاکٹر پرمیشور نے تین نئے پولیس تھانوں گروپن پالیہ، بیگوراور بنڈے پالیہ میں افتتاح کیا۔ساتھ ہی الیکٹرانک سٹی کا ایک نیا سب ڈویژن بھی وجود میں آیا، جس میں بنڈے پالیہ اور بیگور پولیس تھانے شامل ہیں، جبکہ گروپن پالیہ پولیس تھانہ مائیکو لے آؤٹ سب ڈویژن کا حصہ ہوگا۔اس موقع پر وزیر ٹرانسپورٹ رام لنگا ریڈی، پولیس کمشنر پروین سود، ا ڈیشنل کمشنر ہیمنت نمبالکر ، ڈی سی پی بورلنگیا ، بی بی ایم پی کے حکمران پارٹی لیڈر محمد رضوان نواب اور دیگر اہم شخصیات موجود تھیں۔