بنگلورو۔16؍جنوری(ایس او نیوز) محکمۂ پولیس اسے حاصل جدید ترین سہولیات کا استعمال کرتے ہوئے انسداد جرائم کیلئے مستعدی سے کام کرے، چونکہ پولیس کو دی جارہی جدید سہولیات کی زیادہ تشہیرسے منفی اثرات بھی سامنے آرہے ہیں اور جرائم پیشہ عناصر پولیس کو حاصل جدید آلات سے بچنے کیلئے اپنے حربے استعمال کرتے ہیں۔ پولیس کوچاہئے کہ انتہائی مستعدی اور احتیاط کے ساتھ معاملات کی چھان بین اور انسداد جرائم کا کام انجام دے۔ یہ بات آج وزیر اعلیٰ سدرامیا نے کہی۔ شہر میں پولیس افسران کی کانفرنس میں حصہ لیتے ہوئے وزیراعلیٰ نے کہا کہ جرائم کے معاملات اور ان سے نمٹنے کیلئے پولیس کے اقدامات کا آج جائزہ لیا جارہاہے، چونکہ فہرست جرائم کافی طویل ہے ، پولیس کی یہ ذمہ داری ہے کہ اس میں ملوث عناصر کو سخت سے سخت سزا کا حق دار بنائیں۔ ان معاملات کو نمٹانے کی طرف پولیس کو اولین ترجیح دینے کی نصیحت کرتے ہوئے سدرامیا نے کہاکہ پولیس کی سب سے بڑی ذمہ داری عوام کے جان ومال کی حفاظت کرنا ہے۔اس کیلئے پولیس فورس پر عوام کا اعتماد سب سے زیادہ ضروری ہے۔ انسپکٹر سمیت تمام سطح کے پولیس عہدیداران اگر احتیاط کے صبر وتحمل کو اپناکر اپنی ڈیوٹی نبھائیں تو جرائم کو کافی حد تک روکنے میں کامیابی حاصل کی جاسکتی ہے۔انہوں نے کہاکہ پولیس تھانوں کی ذمہ داری سب انسپکٹروں کے حوالے کرکے انسپکٹرس اور دیگر اعلیٰ عہدیداران خاموش نہ بیٹھیں ،بلکہ مسلسل ان کی کارگذاریوں پر نظر رکھیں۔پولیس تھانوں کی حدود میں اگر غنڈہ عناصرسراٹھارہے ہیں تو انہیں روکنے کیلئے اپنے طور پر توجہ دیں۔ حال ہی میں مدور میں ہوئی گروہی جھڑپ میں دو افراد کی موت کا حوالہ دیتے ہوئے سدرامیا نے کہاکہ اگر وہاں کے انسپکٹر نے احتیاط سے کام لیا ہوتا تو شاید ان دو اموات کو بھی ٹالا جاسکتا تھا۔ ٹمکور میں ایک ذہنی معذور لڑکی کے ساتھ منہ کالا کرنے والے اسسٹنٹ سب انسپکٹر کے معاملہ پر وزیر اعلیٰ نے اپنی شدید برہمی کا اظہار کرتے ہوئے کہاکہ اس کے خلاف عصمت ریزی کا کیس درج کیاجائے اور فوری طور پر سے ملازمت سے برخاست کیا جائے۔