بنگلورو۔23؍مئی(ایس او  نیوز) شہر کے سمپیگے ہلی پولیس تھانہ کی حدود میں ایک پولیس والے نے اقدام خود کشی کرنے کے ساتھ اپنی بیوی اور بچوں کو بھی زہر دے کر ماردیا۔ دفتر وزیر اعلیٰ میں کانسٹبل کی ڈیوٹی پر تعینات 35سالہ سبھاش چندرا نے خود زہر پی لیا اور اس سے پہلے اپنی بیوی مینا ، بچوں تین سالہ مانوی اور دیڑھ سالہ پرتھوی کو بھی زہر دے کر ماردیا۔ اس خاندان نے کل رات زہر کھالیاتھا، آج صبح اس کا پتہ چلا تو فوری طور پر سبھا ش اور اس کے بیوی بچوں کو اسپتال پہنچایا گیا ،جہاں سبھاش کی حالت نازک بتائی گئی ہے جبکہ اس کی بیوی اور بچے فوت ہوگئے۔ جیسے ہی اس واقعہ کی اطلاع ملی پولیس نے دروازہ توڑ کر تمام کو بیاپ ٹسٹ اسپتال پہنچایا۔ اس خود کشی کی وجہ کا پتہ چل نہیں پایا ہے۔ سی اے آر میں ہیڈکانسٹبل کی ملازمت پر قائم سبھاش چندرا کو چار ماہ قبل وزیراعلیٰ کی ہوم آفس کرشنا میں متعین کیاگیاتھا۔ ہیگڈے نگر میں سمپیکے ہلی پولیس تھانہ کے عقب میں موجود پولیس کوارٹرس میں اسے مکان دیا گیا تھا۔اعلیٰ پولیس افسران نے شبہ کیا ہے کہ قرض کے بوجھ سے پریشان سبھا ش چندرا نے اقدام خود کشی کیا ہوگا۔بلاری کے متوطن سبھاش چندرا نے چار سال قبل داونگیرے کی وینا سے شادی کی تھی اور اس کے بعد سے یہ دونوں بنگلور ہی میں مقیم تھے۔ یہ بھی بتایاجاتاہے کہ سبھاش چندرا کرکٹ سٹے بازی کا عادی تھا، ہوسکتا ہے کہ اسی میں خسارہ کے نتیجہ میں اس نے یہ قدم اٹھایا ہوگا ۔ اڈیشنل کمشنر آف پولیس ہیمنت نمالکر ، جوائنٹ کمشنر آف پولیس سی اے آر راجپا، ڈی سی پی ہرشا کمار اور دیگر اعلیٰ عہدیداروں نے پولیس کوارٹرس کا دورہ کیا۔