اُڈپی 21؍اگست (ایس او نیوز) بنگلورو سے اڈپی مٹھ میں حاضری کے لئے آنے والے سیاح کے ایک گروپ میں شامل خاتون کے ہاتھ سے بیگ اڑانے والے چوروں کو پولیس نے پیچھا کرکے بڑے ڈرامائی اندازمیں صرف 30منٹ کے اندر گرفتار کرلیا۔

ذرائع نے بتایا کہ بنگلور و کی یہ سیاح خاتون مندر میں پوجا کرنے کے بعداپنی بس کی طرف بڑھ رہی تھی کہ اچانک دو نوجوان سامنے آئے اور اس کے ہاتھ میں موجود بیگ زبردستی چھین کر گاڑی میں فرار ہوگئے۔ موقع پر موجود ایک رکشہ ڈرائیور نے ٹریفک پولیس کو اس کی اطلاع دی۔ ٹریفک کانسٹیبل شیوپّانے اپنی موٹر بائک پر چوروں کا بڑی دور تک پیچھا کیا اور بالآخرپتور میں ایل وی مندر کے پاس انہیں دبوچنے میں کامیاب ہوگیا۔گرفتار شدہ لٹیروں کے نام منوہر اور شکلیش بتائے جاتے ہیں ۔ اسی دوران ٹریفک کانسٹیبل نے اپنے سب انسپکٹر پرکاش اور راجو کو بھی بھاگتے ہوئے چوروں کی اطلاع دی تھی۔ انہوں نے موقع پر پہنچ کر دونوں ملزمین کو اپنی تحویل میں لینے کے بعد شہر لاکر اڈپی ٹاؤن پولیس اسٹیشن کے حوالے کیا۔جس خاتون کا بیگ اڑالیا گیا تھا اس میں تین ہزار روپے نقد اور پندرہ ہزار روپے مالیت کا موبائل فون موجود تھاجسے اس خاتون کوسونپ دیا گیا۔