نئی دہلی21اپریل(ایس او نیوز؍آئی این ایس انڈیا) وزیر اعظم نریندر مودی تین ممالک کے اپنے دورہ کے بعد آج یہاں پہنچ گئے۔مسٹر مودی کے ہوائی اڈے پہنچنے پروزیر خارجہ سشما سوراج نے ان کا استقبال کیا۔ واضح ہوکہ اس درمیان لندن میں ان کے خلاف احتجاج بھی ہوا۔وزیر اعظم 16اپریل کو سویڈن، برطانیہ اور جرمنی کے دورے پر روانہ ہوئے تھے۔وہ سب سے پہلے سویڈن گئے تھے جہاں انہوں نے سویڈن کے وزیر اعظم کے ساتھ دو طرفہ بات چیت کی اور ہندوستان -نارڈک ممالک کے پہلے اجلاس میں شرکت کی۔مسٹر مودی نے اسٹاک ہوم میں ہندوستانی برادری سے بھی خطاب بھی کیا۔ وزیر اعظم اپنے دورے کے اگلے مرحلے میں 17 اپریل کوبرطانیہ پہنچے۔ وہاں لندن میں انہوں نے برطانوی وزیر اعظم ٹریسا مئے کے ساتھ دو طرفہ میٹنگ کی اور ملکہ الزبتھ دوم سے بھی ملاقات کی۔ مسٹر مودی نے ویسٹ منسٹر کے سینٹرل ہال میں ہندوستان کی بات سب کے ساتھ پروگرام میں تقریبا ڈھائی گھنٹے سے زیادہ وقت تک سوال جواب کے ذریعے ہندوستان کے حکمران کے طور پر اپنے نقطہ نظر کو سب کے سامنے رکھا۔ انہوں نے دولت مشترکہ ممالک کے سربراہان مملکت اور سربراہوں کی میٹنگ (چوگم) میں بھی حصہ لیا۔اس دوران انہوں نے کئی دولت مشترکہ ممالک کے سربراہوں کے ساتھ الگ سے دو طرفہ میٹنگ بھی کی۔وزیر اعظم کل لندن سے برلن پہنچے تھے جہاں انہوں نے جرمنی کی چانسلر انجیلا مرکل کے ساتھ ملاقات کی۔برلن میں کچھ دیر رکنے کے بعد وہ وطن روانہ ہو گئے۔