وزیر اعظم بتائیں کہ پلوامہ حملے کے ابتدائی دو گھنٹوں میں انہیں جانکاری تھی یا نہیں، کانگریس کاحملہ جاری،سرکارنے بے حسی کیوں دکھائی؟پی ایم نے مذمت تک نہیں کی
نئی دہلی ، 22 فروری(ایس او نیوز؍آئی این ایس انڈیا) کانگریس نے پلوامہ دہشت گردانہ حملے کے چند گھنٹوں بعد ہی اتراکھنڈ میں وزیر اعظم نریندر مودی کی طرف سے موبائل فون کے ذریعے جلسے سے خطاب کرنے کا دعوی کرتے ہوئے جمعہ کو کہاہے کہ مودی بتائیں کہ حملے کے ابتدائی دو گھنٹوں کے دوران انہیں اس حملے کی معلومات تھیں یا نہیں۔
پارٹی نے یہ بھی کہا کہ اگر وزیر اعظم کو اس کی معلومات تھیں توفوٹوشوٹ کرنے اورپروگرام کرکے انہوں نے بے حسی کیوں دکھائی اور اگر دو گھنٹوں تک اتنے بڑے حملے کے بارے میں معلومات نہیں تھیں کہ تویہ سیکورٹی سے منسلک سنگین سوال ہے۔کانگریس کے ترجمان منیش تیواری نے نامہ نگاروں سے کہاہے کہ14 فروری کودن میں تین بج کر10 منٹ پر حملہ ہوا اور دو گھنٹے بعد وزیر اعظم نے موبائل فون کے ذریعے ریلی سے خطاب کیا،وہ اس جلسہ عام میں پلوامہ حملے کے بارے میں ایک لفظ نہیں بولے،اگر وہ پلوامہ حملے کے بارے میں بولتے، اس کی مذمت کرتے، جوانوں کو خراج عقیدت پیش کرتے تو وہ کم از کم دو منٹ کی خاموشی رکھنے کے لیے کہتے لیکن ایساکچھ نہیں ہوا۔
انہوں نے دوردرشن پر نشر وزیر اعظم کی تقریر کی ایک فوٹیج بھی دکھائی اور دعویٰ کیاہے کہ وزیر اعظم شام میں پانچ بج کر10 منٹ پر جلسے سے خطاب کر رہے تھے۔تیواری نے سوال کیاکہ ہم وزیر اعظم سے پوچھنا چاہتے ہیں کہ آپ اس دن تین بج کر10 منٹ سے پانچ بج کر10 منٹ کے درمیان کیا کر رہے تھے؟ کیا اس دوران آپ کو اس حملے کی معلومات تھیں؟۔ کانگریس کے ترجمان نے کہاہے کہ اس میں دو باتیں ہو سکتی ہیں،پہلی بات یہ ہو سکتی ہے کہ وزیر اعظم کو اس حملے کے بارے میں معلوم تھااور انہوں نے فوٹوشوٹ جاری رکھااورریلی سے خطاب کیا،اگر ایسا ہے تو اس سے بڑی بے حسی کچھ نہیں ہو سکتی۔
انہوں نے کہاکہ دوسری بات یہ ہو سکتی ہے کہ تین بج کر 10 منٹ سے پانچ بج کر 10 منٹ درمیان تک وزیر اعظم کو معلوم نہیں تھا،اگرایساہے تویہ سیکورٹی سے منسلک سنگین سوال ہے،اس سے حکومت کی نااہلی ثابت ہوتی ہے۔ اس سے پہلے جمعرات کو کانگریس کے چیف ترجمان رندیپ سرجیوالا نے الزام لگایا تھا کہ جب ملک اس گھناؤنے حملے کی وجہ صدمے میں تھا تو اس وقت مودی کاربیٹ پارک میں ایک چینل کے لئے فلم کی شوٹنگ اور سیلنگ کر رہے تھے۔ادھر بی جے پی صدر امت شاہ نے کانگریس پر نشانہ لگاتے ہوئے کہا کہ ملک کی سلامتی پر وزیر اعظم کے عزم کو لے کر الزام لگانے کا ملک کے عوام پر کوئی اثر نہیں ہونے والا ہے۔غور طلب ہے کہ گذشتہ 14 فروری کو ہوئے پلوامہ خودکش دہشت گردانہ حملے میں سی آر پی ایف کے کم از کم 40 جوان شہید ہو گئے تھے۔