مہاراشٹر میں پھر بولے مودی، جوانوں کی قربانی کو ضائع نہیں جانے دیا جائے گا
نئی دہلی ،16 ؍فروری (ایس او نیوز؍آئی این ایس انڈیا) وزیر اعظم نریندر مودی آج مہاراشٹر کے ایوت مال اور دھلے ضلع کے دورے پر ہیں۔جہاں انہوں نے کئی منصوبوں کی شروعات کی۔ودربھ کے ایوت مال میں وزیر اعظم قبائلی طالب علموں کے لئے ماڈل رہائشی اسکول کا افتتاح کیا۔اس علاوہ وزیراعظم ہاؤسنگ اسکیم کے تحت بنائے گئے گھروں کی چابھیاں کچھ صارفین کو سونپی۔اس دوران انہوں نے ایک جلسے سے بھی خطاب کیا۔پی ایم مودی نے کہا کہ ملک کی ترقی کے پیچھے کئی قربانیوں کی شراکت ہے۔انہوں نے کہا کہ میں جانتا ہوں کہ ہم سب کس حالات سے گزر رہے ہیں۔پلوامہ میں جو ہوا اس کو لے کر آپ کے غم و غصہ کو میں سمجھ رہا ہوں۔یہاں مہاراشٹر کے 2جوانوں نے پلوامہ میں اپنی جان کی قربانی دی ہے۔پی ایم مودی نے کہا کہ ان شہیدوں کی قربانی ضائع نہیں ہوگی۔ دہشت گرد تنظیموں نے، دہشت گردی کے سرپرستوں نے جو گناہ کیا ہے، وہ چاہے جتنا چھپنے کی کوشش کریں، انہیں سزا ضرور دی جائے گی۔انہوں نے بتایا کہ فوجیوں میں اور خاص طورسی آر پی ایف میں جو ناراضگی ہے، وہ بھی ملک سمجھ رہا ہے اس لیے حفاظتی دستوں کو کھلی چھوٹ دی گئی ہے۔پی ایم مودی نے کہا کہ ملک کی سلامتی کے ساتھ ہی ملک کی خوشحالی کے لئے بھی ہماری حکومت مکمل طور پرمصروف عمل ہے۔