نئی دہلی،17؍مارچ(ایس او نیوز؍آئی این ایس انڈیا)اپنی تقریری صلاحیت سے سیاست کی پچ پر سب کومات دینے والے وزیر اعظم نریندر مودی نے سیاست سے الگ کھیل کی دنیا میں بھی اپنے جداگانہ اندازبیاں سے کرکٹر روی شاستری کو کلین بولڈ کر دیا۔غورطلب ہے کہ اسمبلی انتخابات میں بی جے پی کی شاندار کارکردگی پر کرکٹر روی شاستری نے کمنٹری کے انداز میں وزیر اعظم نریندر مودی کو مبارکباد دی تھی۔روی شاستری نے اپنے ٹوئٹ میں’ ٹریسربلٹ ‘کا استعمال کرتے ہوئے لکھا تھا کہ وزیر اعظم نریندر مودی اور امت شاہ کی جوڑی نے 300کے جادو ئی ہندسہ کو بھی پار کر لیا، بالکل ٹریسر کی بلٹ کی طرح۔دراصل، ہندوستانی کرکٹ ٹیم کے سابق ڈائریکٹر روی شاستری جب کمنٹری کرتے ہیں تو ان کا پسندیدہ جملہ ’ٹریسر کی بلٹ ‘ہوتا ہے، اب یہ ان کی پہچان ہی بن چکا ہے ۔وزیر اعظم نے بھی دوسری طرف سے مورچہ سنبھالتے ہوئے کرکٹر اور کمنٹیٹر کا انہی کے انداز میں شکریہ ادا کیا۔وزیر اعظم نے ٹوئٹر پر لکھا، شکریہ، یوپی انتخابات کے آخری لمحوں میں سخت مقابلہ نہیں تھا، اس لیے آخر میں جمہوریت کی جیت ہوئی۔وزیر اعظم نے اپنے ٹوئٹ میں ’گو ڈاؤ ن ٹو دی وایر‘کا استعمال کیا جو کہ کرکٹ میں آخری گیند تک مقابلہ چلنے کے موقع پر استعمال ہوتا ہے۔خاص بات یہ ہے کہ وزیر اعظم کا یہ کرکٹ والا جواب لوگوں کو خوب پسند آ رہا ہے، ان کا یہ ٹوئٹ پانچ ہزار سے زیادہ بار ری ٹوئٹ کیا جا چکا ہے اور 12ہزار سے زیادہ لوگوں نے اسے لائک کیا ہے۔