لوک سبھا انتخابات میں نہ اتار کر وزیر اعظم نے اڈوانی ،جوشی کی توہین کی : کیجریوال
نئی دہلی،26 مارچ (ایس او نیوز؍آئی این ایس انڈیا) عام آدمی پارٹی کے سربراہ اروند کیجریوال نے منگل کو کہا کہ وزیر اعظم نریندر مودی نے لال کرشن اڈوانی اور مرلی منوہر جوشی جیسے سینئر رہنماؤں کو آئندہ لوک سبھا انتخابات میں نہ اتار کر انکی توہین کی ہے۔دہلی کے وزیر اعلی کیجریوال نے کہا کہ وزیر اعظم کا رویہ ہندو ثقافت کے خلاف ہے، جو کہ لوگوں کو اپنے بڑوں کا احترام کرنے کی تعلیم دیتی ہے۔
کیجریوال نے سلسلہ وار ٹویٹ میں کہاکہ مودی جی نے جس طرح اپنے بزرگوں ۔ اڈوانی جی اور مرلی منوہر جی ۔ کی توہین کی ہے، یہ ہندو ثقافت کے بالکل خلاف ہے۔ہندو مذہب میں ہمیں اپنے بڑوں کا احترام کرنا سکھایا گیا ہے۔انہوں نے کہاکہ لوگ اس بات کی بحث کر رہے ہیں کہ مودی، جوشی اور سشما (وزیر خارجہ سشما سوراج) کی توہین کیوں کر رہے ہیں۔لوک سبھا رکن مرلی منوہر جوشی کو ان کی پارٹی نے آئندہ انتخابات نہیں لڑنے کو کہا ہے۔اسی طرح پارٹی کے بانی رکن اور طویل مدت تک پارٹی کے سربراہ رہے لال کرشن اڈوانی کو بھی انتخابات میں نہیں اتارنے کا فیصلہ کیا گیا۔کیجریوال نے ایک اور ٹویٹ میں کہاکہ جن بزرگوں نے گھر بنایا، انہیں باہر نکال دیا گیا ہے۔جب وہ اپنے بڑوں کا احترام نہیں کر سکتے تو وہ کن کی مدد کریں گے۔