راہل کا طنز، لوک سبھا میں 15منٹ کھڑے نہیں ہو پائیں گے وزیر اعظم
امیٹھی،17؍اپریل ( ایس او نیوز؍آئی این ایس انڈیا )کانگریس صدر راہل گاندھی نے وزیر اعظم نریندر مودی پر آج طنز کیا کہ رافیل سودے اور نیرو مودی معاملات پر لوک سبھا میں 15 منٹ کی تقریر دینے کا ان کے پاس وقت نہیں ہے اور اگر ایسا ہوا بھی تو وہ ایوان میں کھڑے نہیں ہو پائیں گے۔اپنے پارلیمانی حلقہ امیٹھی کے دورے پر آئے راہل نے کہا چاہے وہ رافیل کا معاملہ ہو، چاہے نیرومودی کا وزیر اعظم لوک سبھا میں کھڑے نہیں ہو پائیں گے۔وزیر اعظم پورے ملک کا چکر کاٹ رہے ہیں مگر لوک سبھا میں 15منٹ تقریر کرنے کا وقت نہیں ہے ان کے پاس۔اگر وہ 15 منٹ وقت دے دیں، تو لوک سبھا میں کھڑے نہیں ہو پائیں گے۔انہوں نے الزام لگایا کہ نیرومودی ملک کے لوگوں کا پیسہ لے کر بھاگ گیا لیکن وزیر اعظم ایک لفظ نہیں کہتے۔مودی جی نے نوٹ بندی کرکے آپ کی جیب سے 500 اور ہزار کے نوٹ نکالے اور نیرو مودی کی جیب میں ڈال دیئے، رافیل میں براہ راست چوری، اپنے ایک صنعتکار دوست کو 45ہزار کروڑ روپے دے دیے، روزگار چھینا، مگر اس پر وزیر اعظم ایک لفظ بھی نہیں کہتے۔نیرومودی کو میرو مودی کہہ کر پکارتے ہیں۔میہل چوکسی کو میہل بھائی کہتے ہیں۔یہ سچائی ہے۔راہل نے ایک سوال پر کہا کہ مودی نے کہا تھا کہ عوام کے اچھے دن آئیں گے۔سچائی کیا نکلی کہ نیرومودی اور میہل چوکسی جیسے 15لوگوں کے اچھے دن آگئے اور عوام، کسان، مزدور اور غریبوں کے برے دن شروع ہو گئے۔