علی گڑھ:25/اپریل (ایس او نیوز/آئی این ایس انڈیا)عالمی یومِ ارض کے موقعہ پرعلی گڑھ مسلم یونیورسٹی کی طلبأ یونین نے شجر کاری مہم کا آغاز کیا جس کے تحت طلبأ یونین نے یونیورسٹی کیمپس میں 50ہزار پودے لگانے کا ہدف مقرر کیا ہے۔ مہم کا آغاز اے ایم یو کے وائس چانسلر لیفٹیننٹ جنرل ضمیرالدین شاہ نے مولانا آزاد لائبریری کیمپس میں پودے لگاکر کیا۔اس موقعہ پر وائس چانسلر لیفٹیننٹ جنرل ضمیر الدین شاہ نے اپنے خطاب میں طلبأ یونین کی بھر پور تعریف کرتے ہوئے کہا کہ شجر کاری کی اس عظیم مہم سے یونیورسٹی کے سر سبز کیمپس میں زبردست توسیع ہوگی اور اس سے آنے والے سالوں میں اے ایم یو ملک کی سب سے بڑی سرسبز یونیورسٹی بن جائے گی۔ انہوں نے کہا کہ اس سے کیمپس اور اس کے قرب و جوار میں رہنے والے لوگوں کو شفاف ہوا اور شفاف ماحولیات حاصل ہوگی اور بارش کے موسم میں بارش بھی زیادہ ہوگی۔جنرل شاہ نے کہا کہ پیڑ پودے حقیقت میں حیاتِ انسانی کے فروغ کی اہم کڑی ہیں اور ان سے نہ صرف ماحولیات کو ترو تازگی حاصل ہوتی ہے بلکہ مٹی کے کٹاؤ اور قدرتی آفات سے بھی زمین کا تحفظ ہوتا ہے۔پرو وائس چانسلر برگیڈیئر سید احمد علی نے طلبأ یونین کو مبارکباد پیش کرتے ہوئے  کہا کہ اس طرح کی مہم سماجی حساسیت کو فروغ دینے میں معاون ثابت ہوتی ہے اور اے ایم یو طلبأ کی اس میں حصہ داری قومی سطح پر ان کے حساس ہونے اور ان کی ترقی پذیر فکر  کی علامت ہے۔اس موقعہ پر یونیورسٹی کے افسر رابطہئ عامّہ مسٹر عمر سلیم پیرزادہ اور ان کی ٹیم نے ایڈمنسٹریٹو بلاک کیمپس میں پودے لگاکر اس مہم میں حصہ لیا۔ انہوں نے طلبأ یونین کے اس اقدام کو سراہتے ہوئے سبھی لوگوں سے اپیل کی کہ وہ اپنے علاقوں میں زیادہ سے زیادہ پودے لگاکر جغرافیائی ماحول کو صحت مند، شفاف اور آلودگی سے پاک بنانے میں اپنا تعاون پیش کریں۔اس کے علاوہ مختلف شعبوں اور اسکولوں میں شجر کاری مہم چلائی گئی جس میں طلبأ و طالبات نے بڑی تعداد میں حصہ لیا۔اس کے علاوہ یونیورسٹی کے سینئر اساتذہ نے اس مہم میں اپنا بھر پور تعاون پیش کیا جن میں پروفیسر سہیل صابر، ڈاکٹر نبی حسن، سینئر صحافی طارق حسن، مسٹرسنتوش شرما، مسٹرکامران سمیت طلبأ یونین کے عہدیداران مسٹر فیض الحسن(صدر) مسٹرندیم انصاری(نائب صدر) مسٹر نبیل عثمانی(سکریٹری) مسٹر وصیل کے (کیبنیٹ رکن) اور دیگر کیبنیٹ اراکین نے بڑھ چڑھ کر حصہ لیا۔