ہاوانا 19/مئی (ایس او نیوز/ایجنسی ) کیوبا میں سرکاری فضائی کمپنی کا مسافر طیارہ ایئرپورٹ کے قریب گر کر تباہ ہوگیا جس کے نتیجے میں 110 افراد ہلاک اور 3 زخمی ہوگئے۔اطلاعات کے مطابق کیوبا کی قومی فضائی کمپنی کیوبن ایوی ایشن کا مسافر طیارہ دارالحکومت ہوانا کے جوز مارٹی بین الاقوامی ہوائی اڈے کے قریب گر کر تباہ ہوا۔

بوئنگ 737 طیارے میں 104 مسافر اور عملے کے 9 ارکان سوار تھے جن میں سے صرف 3 افراد کو ملبے سے زندہ نکالا گیا ہے اور ان کی حالت بھی انتہائی تشویش ناک ہے۔

کیوبا کے مقامی میڈیا کے مطابق طیارے نے جوز مارٹی ایئرپورٹ سے اڑان بھری تھی اور اسے کیوبا کے مشرقی شہر ہولگوئین جانا تھا تاہم اڑان بھرنے کے کچھ ہی دیر بعد طیارہ گر کر تباہ ہوگیا۔

بتایا گیا ہے کہ طیارے میں عملے کے 9 ارکان اور دیگر مسافروں سمیت 113 افراد موجود تھے۔اس حوالے سے ایک فوجی افسر نے بتایا کہ حادثے میں صرف 3 افراد زندہ بچے ہیں اور ان کے اس دعوے کی تصدیق کیوبا کے سرکاری میڈیا نے بھی کی ہے۔

حادثے کے بعد سماجی رابطوں کی ویب سائٹ پر جاری تصاویر میں حادثے کے مقام سے دھویں کے گہرے سیاہ بادل اٹھتے ہوئے دیکھے  گئے ہیں۔ بدقسمت طیارے کا ملبہ ہوانا کے علاقے رینچو بوئیروس میں کھیت میں پایا گیا جس میں آگ لگی ہوئی تھی۔

حادثے کی اطلاع ملتے ہی امدادی ٹیمیں اور فائر بریگیڈ کی گاڑیاں موقع پر پہنچ گئیں اور آگ بجھانے کا سلسلہ شروع کیا گیا۔ عینی شاہدین نے بتایا کہ انہوں نے بعض زخمیوں کو ایمبولینس کے ذریعے اسپتال منتقل کرتے ہوئے دیکھا تھا۔

طیارے کو پیش آنے والے حادثے کی وجہ معلوم نہیں ہوسکی ہے اور واقعے کی تحقیقات شروع کردی گئی ہیں۔