بیندور21؍جنوری (ایس او نیوز) ایک ہفتے قبل رات کے اندھیرے میں ناگور کی نور جمعہ مسجد کے کمپاؤنڈ میں شرپسندوں نے خنزیر کے کٹے ہوئے اجزاء پھینک کر فرقہ وارانہ کشیدگی پیدا کرنے کی کوشش کی تھی ، اس سلسلے میں بیندور پولیس نے 5ملزمین کو گرفتار کرلیا ہے۔
گرفتار شدگان کی شناخت نوین کھاروی(۲۴سال)، سریدھر کھاروی (۲۵سال)، رگھو عرف راگھویندرا کھاروی (۲۳سال)، روی چندرا اور ناگراج کے طور پر کی گئی ہے۔
یاد رہے کہ 14جنوری کی رات کو 11بجے کے قریب ایک موٹر بائک پر سوار ہوکر آنے والے دو شرپسندوں نے خنزیر کے کان، اور پاؤں سے بھرا ہوا ایک تھیلا نورجمعہ مسجد کے کمپاؤنڈ میں پھینکا تھا جس کے بارے میں فجر کی اذان سے قبل مؤذن کو معلوم ہوا۔یہ پورا منظر مسجد میں لگے ہوئے سی سی ٹی وی کیمرے میں قید ہوگیا تھا۔ اسی دن بیندور پولیس اسٹیشن میں شکایت درج کی گئی اور تحقیقات کے دوران کیمرے کی فوٹیج سے پولیس نے FZموٹربائک پر سوار ہوکر آنے اور خنزیر کے کٹے ہوئے اجزاء سے بھرا تھیلا مسجد کے کمپاؤنڈ میں پھینکنے والے ملزمین کی شناخت کرلی ۔
اس کے بعد کنداپور ڈپٹی سپرنٹنڈنٹ آف پولیس دنیش کمار کی نگرانی میں پولیس نے کارروائی کی اور مذکورہ بالا ملزمین کو گرفتار کرلیا۔پولیس کا کہنا ہے کہ تفتیش کے دوران ملزمین نے بتایا ہے کہ فرقہ وارانہ کشیدگی پھیلانے کی نیت سے اس اشتعال انگیز حرکت کا منصوبہ روی چندرا کے دماغ میں آیا تھااور اسی کے گھر پراس منصوبے پرعمل درآمد کا خاکہ بنایاگیاتھا۔گرفتاری کے بعد ملزمین کو عدالت میں پیش کیا گیا جہاں سے انہیں عدالتی حراست میں بھیج دیا گیا ہے۔
سمجھا جاتا ہے کہ پچھلے کچھ عرصے سے ساحلی علاقے میں فرقہ وارانہ تصادم کے واقعات میں کمی آگئی ہے اور امن و امان کا ماحول جو بناہو اہے اس سے پولیس کو جہاں ایک طرف راحت کی سانس لینے کا موقع ملا ہے ، وہیں پر فرقہ پرست طاقتیں اور تنظیمیں بدامنی پھیلانے کے بہانے ڈھونڈ رہی ہیں۔اور نور جمعہ مسجد کا یہ تازہ واقعہ اسی سلسلے کی ایک کڑی ہے۔