جدہ یکم جولائی (ایس او نیوز) بھٹکل مسلم کمیونٹی کی طرف سے سعودی عربیہ کے شہر جدہ میں عیدملن کی تقریب امسال  عیدالفطر یعنی یکم شوال کی رات منعقد کی گئی جس میں مختلف پروگراموں کے درمیان جدہ میں زیر تعلیم ہونہار بچوں کی تہنیت کرتے ہوئے انہیں تعلیمی ایوارڈ سے نوازا گیا۔ پروگرام میں بھٹکل جامعہ اسلامیہ کےمہتمم مولانا مقبول کوبٹے ندوی مہمان خصوصی کےطو پر اور بھٹکل جےڈی ایس لیڈر نیز مجلس اصلاح و تنظیم کے نائب صدر عنایت اللہ شاہ بندری اعزازی مہمان کے طور پر شریک رہے۔

جدہ میں رہائش پذیر بھٹکلی عوام کو بھٹکل کے حالات سے واقفیت  کراتے ہوئے عنایت اللہ شاہ بندری نے کہا کہ بھٹکل  میں  بظاہر سب کچھ ٹھیک لگ رہا ہے، مگر اندرونی طور پر حالات بالکل ٹھیک نہیں ہے، انہو ں نے لاء اینڈ آرڈر کی صورتحال پر تشویش کا اظہار کرتے ہوئے  کہا کہ بھٹکل میں ایک کے بعد ایک کئی طرح کے واقعات پیش آرہے ہیں، مگر پولس اور انتظامیہ شرپسندوں کےخلاف کسی بھی طرح کی کاروائی نہیں کررہی ہے، انہوں نے مندروں میں گوشت پھینکے جانے والے معاملات سمیت پولس تھانہ میں کانگریس  لیڈر پر حملہ کرنے کے تعلق سے بھی پولس کی کارکردگی پر سوالات اُٹھائے، البتہ کہا کہ اس تعلق سے تنظیم پولس کے اعلیٰ حکام کےساتھ رابطہ میں ہے۔

عنایت اللہ شاہ بندری نے تنظیم کے سماجی کاموں کی تفصیلات سے آگاہ کراتے ہوئے کہا کہ تنظیم میں زکاۃ کا اچھا نظام چلتا ہے اور ہم مستحق لوگوں کو ہرممکن مالی تعائون فراہم کرتے ہیں، عنایت اللہ  نے عید ملن تقریب میں موجود تمام لوگوں سے تنظیم کے لئے  اپنی اپنی زکواۃ کی رقم جماعت کے  ذمہ داران کے ذریعے فراہم کرنے کی اپیل کی۔

مولانا مقبول کوبٹے ندوی نے اپنے خطاب میں معاشرہ میں پھیلی برائیوں کی طرف اشارہ کرتے ہوئے عوام سے اُن سے بچنے کی تاکید، انہوں نے جدہ جماعت کی سرگرمیوں کی ستائش کرتے ہوئے  عیدملن تقریب کے کامیاب انعقاد پر ذمہ داران کو مبارکباد بھی پیش کی۔

تقریب میں بچوں نے دلچسپ اور مزاحیہ پروگرام  پیش کئے اور حاضرین نے اُن کی خوب ہمت آفزائی کی۔

تقریب کے پہلے سیشن کاآغاز برماور سید قطب کی تلاوت کلام پاک سے ہوا،  عیدملن تقریب کے کنوینر عبدالمعزجوکاکو نے استقبالیہ پیش کیا۔اُسامہ مُنیری نے نعت پاک پیش کی، جس کے بعد تعلیمی ایوارڈ کمیٹی کے کنوینر نوید ائیکری نے جدہ میں زیرتعلیم بھٹکل کے ہونہارطلبا کو تعلیمی ایوارڈ کے لئے اسٹیج پر بلاتے ہوئے مہمانوں کے ہاتھوں ایوارڈ پیش کیا۔جبکہ  لئیق کے ایس نے پروگرام کی نظامت کی۔

جماعت کے صدر نعمان علی اکبرا نے پروگرام کی صدارت کی اور آخر میں جماعت کے جنرل سکریٹری عُبیداللہ عسکری نے کلمہ تشکر پیش کیا۔

عیدملن تقریب میں خواتین کے لئے الگ پروگرام ترتیب دیا گیا تھا جس میں  بھٹکل جامعات الصالحات کی مہتممہ محترمہ زینت النساء بنت شبیر احمد رکن الدین عرف زینت آپا کی  بھٹکل کی خواتین کے لئے دی جانے والی خدمات کی خوبصورت انداز میں  سراہنا کی گئی اور اُن کی خدمت میں  سپاس نامہ پیش کیا گیا۔ خیال رہے کہ خواتین کے لئے فیضان شاہ بندری کی زوجہ نے کنوینرشپ کی ذمہ داری بخوبی نبھائی۔

عید ملن کے لئے اسٹیج پروگرام کی ذمہ داری شعیب کوٹیشور، زاہد رکن الدین اور عبدالسلام دامودی کو سونپی گئی تھیں، جبکہ طعام کی ذمہ داری عارف قاسمجی، ہال کے لئے ارشد ائیکری، انعامات کے لئے قمر سعدا اور والنٹیر کے لئے ریحان کوبٹے نے اپنے اپنے طور پر ذمہ داری سنبھالیں۔

آخر میں ریفل ڈراء کے ذریعے کافی ممبران نے قیمتی انعامات حاصل کئے جس میں پہلا انعام  1,25,000 روپیہ نقد، تین ایکٹیوا اسکوٹر ودیگر کافی انعامات تقسیم کئے گئے۔

پروگرام میں عمرہ کی ادائیگی  کے لئے آئے ہوئے بھٹکلی مہمانان کو خصوصی دعوت دی گئی تھی جس سے کافی احباب نے شرکت کی اور انعامات میں مہمانوں کو بھی شامل کیا گیا۔