ڈیزل-پیٹرول کی قیمتیں اب تک کی سب سے زیادہ
نئی دہلی20مئی (ایس او نیوز؍ایجنسی) ڈیزل اور پیٹرول کی لگاتار قیمتیں بڑھ رہی ہیں اور اب وہ اب تک کی سب سے زیادہ ہو چکی ہیں۔ کانگریس نے ڈیزل اور پٹرول کی قیمت پانچ سال میں سب سے اونچی سطح تک پہنچنے پر تشویش ظاہر کرتے ہوئے کہا کہ مودی حکومت کو ایندھن سے ہونے والی کمائی کا استعمال الیکشن جیتنے اور حکومتیں بنانے کے لئے کرنے کے بجائے تیل کی قیمتیں کنٹرول کرنے اور عوام کو فائدہ پہنچانے کے لئے کرنا چاہئے۔ پیٹرول اور ڈیزل کی قیمتوں میں مستقل اضافہ ہو رہا ہے۔
پٹرول اور ڈیزل کی قیمتوں میں ایک بار پھر اضافہ ہوا ہے، پٹرول جہاں 33 پیسے مہنگا ہو گیا ہے وہیں ڈیزل بھی 26 پیسے مہنگا ہوا ہے۔ اس اضافہ کے بعد دہلی میں پٹرول 76.24 روپے فی لیٹر اور ڈیزل 65.57 روپے فی لیٹر تک مہنگا ہو گیا ہے۔ پٹرول ڈیزل کی یہ قیمتیں 2013 کی ریکارڈ سطح سے بھی اوپر چلی گئیں ہیں۔
کانگریس کے ترجمان جے ویر شیر گل نے یہاں صحافیوں سے کہا کہ ملک میں مہنگائی آسمان چھو رہی ہے اور پٹرول و ڈیزل کے دام پانچ سال میں بلند ترین سطح پر پہنچ گئے ہیں۔ حکومت نے ان چار سالوں کے دوران ایندھن کی فروخت سے جم کر کمائی کی ہے۔ مودی حکومت کو اس کمائی کا استعمال کرناٹک اور دیگر ریاستوں میں حکومت بنانے کے واسطے ممبران اسمبلی کی خریداری جیسے کاموں کی بجائے عام لوگوں کے مفاد میں کرنا چاہئے۔
انہوں نے کہا کہ مودی حکومت نے ایندھن سے ٹیکس کی شکل میں اب تک دس لاکھ کروڑ روپے حاصل کئے۔ اسی پیسے کے بل پر وہ جمہوریت کو نقصان پہنچانے کی کوشش کر رہی ہے۔ انہوں نے کہا کہ اس کمائی کا فائدہ عام لوگوں کو بھی ملنا چاہئے اور تیل کی قیمتیں گھٹا ئی جانی چاہئے۔
ترجمان نے اسٹاف سلیکشن کمیشن میں قوانین کی خلاف ورزی کر کے اس کا صدر مقرر کرنے کا بھی حکومت پر الزام عائد کیا اور کہا کہ گجرات کیڈر کے جس افسر کو سزا دی جانی چاہئے اسکو سروس دینے کے لئے مودی سركارنے قوانین بدلے ہیں اور نوجوانوں کے ساتھ کھلواڑ کیا ہے۔