یلاپور میں پٹرول اور ڈیزل کی قیمتوں اور تھرڈ پارٹی انشورنس پریمئم میں اضافہ کے خلاف احتجاجی مظاہرہ
یلاپور22؍جولائی (ایس او نیوز) پٹرول اور ڈیزل کی قیمتوں کے علاوہ موٹر گاڑیوں کے تھرڈ پارٹی انشورنس پریمئم میں اضافہ کے خلاف ٹرک ڈرائیور اور مالکان کی یونین کی جانب سے یلاپور ماگوڈ کراس پر احتجاجی مظاہرہ کیا گیا۔ مظاہرین نے نیشنل ہائی وے 63پر ٹائر جلاکر لاریوں کی ہڑتال کی۔
ٹرک ڈرائیورس اور مالکان کی ریاستی یونین اورآل انڈیا یونین نے مشترکہ طور پر اس ہڑتال کا اہتمام کیاتھا۔ ہڑتال کے مطالبے کو نظر انداز کرکے جو لاریاں سڑک پر دوڑتی نظر آئیں اسے احتجاجیوں نے آگے بڑھنے سے روک دیا۔جس کے نتیجے میں نیشنل ہائی وے کے کنارے تقریباً 200ٹرکوں کی قطار لگ گئی۔مظاہرین کا کہنا تھا کہ ایک طرف موٹر گاڑیاں خریدنے کے لئے بینکوں سے لیا گیا قرضہ واپس لوٹانا ہوتا ہے تو دوسری طرف پٹرول اور ڈیزل کے دام بڑی تیزی سے بڑھتے جارہے ہیں ۔یہ مسئلہ ٹرک مالکان کے لئے ناقابل برداشت بوجھ بنتا جارہا ہے اور ٹرک مالکان کو بڑے مصائب کا سامنا کرنا پڑرہا ہے۔
ٹرک ڈرائیور اور مالکان کی یونین کے تعلقہ صدر اور ضلعی نمائندے مہیش نائک نے مطالبہ کیا کہ حکومت پٹرول اور ڈیزل کی قیمتوں کے علاوہ انشورنس پریمئم کو فوراً کم کردے ۔ ساتھ ہی ساتھ گولّا پور اور کیروتّی میں سب پولیس اسٹیشنس قائم کرے جس کامطالبہ برسوں سے حکومت اور محکمہ پولیس سے کیا جارہا ہے۔
احتجاجی مظاہرے کے اس موقع پرروپیش، روی راج، پربھو، دادا پیر، سریش، سنجو، مرلی، غوث، منّا، راجا پربھو، مہانتیش گاؤلی اور دیگر افراد موجود تھے۔
