بھٹکل 4؍اپریل (ایس او نیوز) بھٹکل تعلقہ کے ماولّی 1گرام پنچایت کے لوگوں نے فیصلہ کیا ہے کہ اگر ان کے گاؤں میں پانی کی فراہمی کا انتظام نہیں کیا جاتا تو پھر وہ لوگ اس مرتبہ الیکشن کا بائیکاٹ کردیں گے۔
بتایا گیا ہے کہ اس دیہات کے نیشنل کالونی باڈکیری میں گزشتہ کئی برسوں سے پینے کے پانی کی قلت ہے اور عوام بڑی دشواریوں سے گزر رہے ہیں۔ عوامی منتخب نمائندے ہر بار وعدے کیا کرتے ہیں مگر اس مسئلے کو مستقل حل کرنے پر توجہ نہیں دیتے ۔لہٰذا تنگ آکر یہاں کے عوام نے یہ فیصلہ کرلیا ہے کہ اگر اب بھی کوئی اقدام نہیں کیا جاتا توپھر وہ لوگ اپنے ووٹ کا استعمال نہیں کریں گے۔اس ضمن میں دلت سنگھرش سمیتی کی جانب سے ماولّی 1گرام پنچایت کے ذمہ داران کو میمورنڈم پیش کیا گیا ۔ان کا کہنا تھا کہ بھٹکل تعلقہ میں پینے کے پانی کے کئی منصوبوں کو عملی جامہ پہنایا گیا ہے ، لیکن باڈکیری گرام والوں کی طر ف کوئی توجہ نہیں دی جارہی ہے اور انہیں بنیادی سہولتیں فراہم کرنے کے لئے کوئی بھی آگے نہیں بڑھ رہا ہے۔اس علاقے کی آج بھی وہی حالت ہے جو کہ ملک کی آزادی سے قبل تھی۔سمیتی کے لوگوں نے الزام لگایا یا کہ حقیقی طور پر پسماندہ اور پچھڑے طبقات کے لئے جو سرکاری اسکیمیں جاری ہوتی ہیں ، اسے بھی دیگر طبقات والے علاقوں میں منتقل کردیا جاتا ہے۔
میمورنڈم دیتے ہوئے دلت سنگھرش سمیتی کے ذمہ داران نے کہا کہ آئندہ 10دنوں کے اندر پینے کے پانی کی سہولت فراہم کرنے کے لئے سرکاری حکام اگر اقدامات نہیں کرتے توپھر بھٹکل تعلقہ کے پسماندہ طبقے سے وابستہ تمام لوگ متحد ہوکر انتخابات کا بائیکاٹ کریں گے۔اس موقع پر ماروتی پاوسکر، ایشور باکڈ، سبرامنیا باکڈ، ایڈوکیٹ رویندرا منگلا، کرن شیرور وغیرہ موجود رتھے۔