بھٹکل:02؍فروری (ایس او نیوز) تعلقہ کے بئیلور سولے بیڈو میں ایک بندر کی مشتبہ حالت میں موت واقع ہونے سے علاقہ کے لوگوں کے ساتھ ساتھ اطراف کے علاقوں کے لوگوں میں بھی خوف کی لہر دوڑ گئی ہے یہ واقعہ سنیچر کو پیش آیا ہے۔
اطلاع کے مطابق گنیش نائک نامی ایک شخص نے بیلور پنچایت کو خبر دی کہ درخت پر بیٹھا ہوا ایک بندر اچانک نیچے گرگیا ہے، اطلاع ملتے ہی پنچایت صدر منجوناتھ نائک ترقیاتی افسران کے ساتھ جائے وقوع پر پہنچے، جہاں بندر کو کھانستے ہوئے دیکھا گیا جس کے تھوڑی ہی دیر بعد بندر ہلاک ہوگیا۔
اطلاع ملتے ہی تعلقہ میڈیکل آفیسر ڈاکٹر سدھا مورتی بھٹ نے مویشیوں کے ڈاکٹر سوریا کانت اور دیگر عملے کو لےکر متعلقہ مقام پر پہنچی۔ بندر کے جسم سے ذرات نکال کر جانچ کے لئے شیموگہ لیباریٹری کو بھیج دیاگیا، جس کے بعد پنچایت عملے کے تعاون سے قومی شاہراہ کنارے بندر کو جلادیاگیا۔
میڈیکل آفیسر کا کہنا ہے کہ ظاہری طورپر یہ کوئی بندر بخار نہیں لگ رہاہے، مگر جب تک لیباریٹری کی رپورٹ نہیں آتی تب تک بندر کی موت کے متعلق کچھ کہنا ممکن نہیں ہے۔
اس موقع پر پنچایت صدر منجوناتھ نائک نے الزام لگاتے ہوئے اس بات کی سخت مذمت کی فور یسٹ علاقے میں بندر کی موت ہونے کے باوجود محکمہ جنگلات کے افسران نے بندر کی آخری رسومات ادا کرنے کی اجازت نہیں دی۔