پنتھرس سربراہ نے سید مرفاد شاہ کے والدین سے ملاقات کی
جموں:13/ اگست (ایس او نیوز/آئی این ایس انڈیا) اسٹیٹ لیگل اینڈکمیٹی کے ایکزیکیوٹیو چیرمین اور سپریم کورٹ کے سینئر وکیل پروفیسر بھیم سنگھ نے آج ایک مقامی نوجوان آنجہانی سید مرفاد شاہ کے والدین سے ملاقات کی جسے ڈاکٹر فاروق عبداللہ کی نجی رہائش گاہ بٹھنڈی ، جموں پر تعینات سلامتی دستوں نے بے رحمی سے 4اگست، 2018کو قتل کردیا تھا۔پروفیسر بھیم سنگھ نے مرفاد شاہ کے اہل خانہ کے ساتھ تعزیت کرتے ہوئے انہیں یقین دلایا کہ انہیں انصاف ملے گا اور قصورواروں کو سزا ملے گی۔ اس ملاقات میں ان کے ساتھ محترمہ انیتا ٹھاکر اور تسلیم کوثر بھی تھیں۔انہوں نے آنجہانی سید مرفاد شاہ کے والدکے مطالبہ کے باوجود پولیس کے اس معاملہ میں ایف آئی آر درج نہیں کرنے پر حیرت کا اظہا رکیا ۔انہوں نے جموں وکشمیر کے گورنر این این ووہرہ سے مطالبہ کیا کہ اس معاملہ کی بلاتاخیر ہائی کورٹ کے موجودہ جج سے عدالتی تحقیقات کرائی جائے اور پولیس کو معاملہ میں ایف آئی آردرج کرنے کی بھی ہدایت یں۔انہوں نے کہاکہ اس بات کے کافی ثبوت موجود ہیں کہ اس نوجوان کو بلاکسی وجہ کے سابق وزیراعلیٰ کے گھر کے باہر مارا گیا ہے اور اس کی لاش کو گھر کے اندرلے جایا گیاتاکہ یہ تاثرپیدا کیا جاسکے کہ سیدمرفاد شاہ نے وزیراعلیٰ کے گھر میں زبردستی داخل ہونے کی کوشش کی تھی۔ انہوں نے کہا کہ اگر حکومت اس کے کنبہ کو انصاف دلانے میں ناکام رہی تواسٹیٹ لیگل ایڈ کمیٹی اس معاملہ بلاتاخیر سپریم کورٹ لے جائے گی۔